రెండు కమాండ్ కేంద్రాలు ప్రారంభం- చైనానే లక్ష్యం!

ఛండీగఢ్‌, గువాహటిలో నూతనంగా ఏర్పాటు చేసిన కమాండ్‌ కేంద్రాలను ఇండో టిబెటన్ పోలీస్ దళం శుక్రవారం ప్రారంభించింది. ప్రస్తుతం ఉన్న పరిస్థితులను దృష్టిలో ఉంచుకొని కేంద్రాలను తక్షణమే ప్రారంభించినట్లు ఐటీబీపీ వెల్లడించింది. చైనా సరిహద్దు అయిన వాస్తవాధీన రేఖకు దళాలను పంపేందుకు ఈ కమాండ్‌ కేంద్రాల వినియోగించనున్నారు.

కేంద్రం కొత్తగా మంజూరు చేసిన రెండు కమాండ్ సెంటర్లను ఇండో-టిబెటన్ సరిహద్దు పోలీసు దళం(ఐటీబీపీ) శుక్రవారం ప్రారంభించింది. గువాహటి, ఛండీగఢ్​లో ఉన్న ఈ రెండు కేంద్రాలు.. వాస్తవాధీన రేఖ వెంబడి సైన్యాన్ని మోహరించడంపై ప్రత్యేకంగా పర్యవేక్షిస్తాయి.

ప్రస్తుత పరిస్థితుల్లో ఈ కేంద్రాలను తక్షణమే ప్రారంభించాల్సిన అవసరం ఉందని ఐటీబీపీ కేంద్ర కార్యాలయం పేర్కొంది. ఇటీవల భారత్​-చైనా సరిహద్దులో ఉద్రిక్తతలు తలెత్తిన నేపథ్యంలోనే ఈ కార్యాలయాలను సత్వరం ప్రారంభించినట్లు అధికారులు వెల్లడించారు.

ఆర్మీలో 'లెఫ్టినెంట్ జనరల్' హోదాకు సమానమైన 'అడిషనల్‌ డైరెక్టర్‌ జనరల్‌' స్థాయి అధికారి నేతృత్వంలోఈ కేంద్రాలు పనిచేస్తాయని ఐటీబీపీ పేర్కొంది. ఈ కమాండ్‌ల ద్వారా నిఘా, దళాల మోహరింపుతో పాటు పలు పాలనాపరమైన కార్యకలాపాలను నిర్వహించుకోవచ్చని తెలిపింది. ఆర్మీతో కలిసి పనిచేసే విధంగా వీటిని ఏర్పాటు చేసినట్లు వివరించింది.

ఇదీ చదవండి: జులై 3న దేశవ్యాప్త నిరసనలకు కార్మిక సంఘాల పిలుపు