'కొంచెం పనుంది... నా సజీవ సమాధి 2045కు వాయిదా'

ఆ ఊరంతా ఉత్కంఠ. శివదూత మరికొద్ది క్షణాల్లో సజీవ సమాధి కాబోతున్నాడు. ఆ అద్భుత దృశ్యాన్ని కళ్లారా చూసేందుకు పొరుగు ఊర్ల నుంచి వందలాది మంది భక్తులు తరలివచ్చారు. అతీత శక్తులున్న స్వామి ఆశీర్వాదం కోసం ఎగబడ్డారు. ఇంతలో... 'నాకు భూమిపై అప్పగించిన పనులింకా పూర్తి కాలేదు..' అంటూ జీవ సమాధిని మరో 25 ఏళ్లకు వాయిదా వేసేసి భక్తులను నిరాశ పరిచాడు ఆ స్వామీజీ.

తమిళనాడు శివగంగైలో కొద్ది రోజుల క్రితం ఇరులప్పసామి జీవ సమాధి అవుతానని చేసిన ప్రకటన కలకలం సృష్టించింది. కానీ... ఈ రోజు అర్ధరాత్రి 12 గంటల నుంచి ఉదయం 5 గంటల మధ్య జరగాల్సిన ఈ జీవసమాధి కార్యక్రమం 2045 సంవత్సరానికి వాయిదా పడింది.

71 ఏళ్ల వయసులో శివ భక్తుడు ఇరులప్పసామి జీవ సమాధి అవుతానని ప్రకటించాడు. కానీ... ఈ కార్యక్రమానికి పోలీసులు అనుమతించలేదు. ఇలాంటి అంధ విశ్వాసాలను ఆపేయాలంటూ ఆదేశాలిచ్చారు. అయినా వినకుండా కార్యక్రమానికి అంతా సిద్ధం చేశారు. భక్తులు తండోపతండాలుగా తరలివచ్చారు. చివరి క్షణంలో ఏమైందో ఏమో గానీ స్వామీజీ జీవ సమాధిని ఆపేశాడు.

భూమిపై తాను చేయాల్సిన పనులు ఇంకా ఉన్నాయంటూ కార్యక్రమాన్ని వాయిదా వేశాడు. మరో 25 ఏళ్ల తర్వాత తన జీవ సమాధి తథ్యం అని పలికాడు. అద్భుతాన్ని చూద్దామని వచ్చిన భక్తులంతా నిరాశగా వెనుదిరిగారు.

ఇదీ చూడండి:అత్త పాడె మోసిన నలుగురు కోడళ్లు!