'చిదంబరం ఆరోగ్యంపై అధ్యయనానికి మెడికల్​ బోర్డ్​'

కేంద్ర మాజీ మంత్రి పి.చిదంబరం ఆరోగ్య పరిస్థితిపై మెడికల్​ బోర్డు ఏర్పాటు చేయాలని  దిల్లీ హైకోర్టు ఆదేశించింది. బోర్డు నేడు సమావేశమై ఆయన ఆరోగ్య పరిస్థితిని సమీక్షించాలని.. రేపు కోర్టుకు నివేదిక అందించాలని సూచించింది.

కేంద్ర మాజీ మంత్రి పి. చిదంబరం ఆరోగ్య పరిస్థితిపై అధ్యయనం చేసేందుకు తక్షణమే మెడికల్​ బోర్డు​ ఏర్పాటు చేయాలని దిల్లీ ఎయిమ్స్​​ను ఆదేశించింది అక్కడి హైకోర్టు. ప్రస్తుతం ఈ కాంగ్రెస్​ సీనియర్​ నేత.. ఐఎన్​ఎక్స్​ మీడియా కేసులో అరెస్టయి జ్యుడీషియల్​ కస్టడీలో ఉన్నారు.

క్రోన్స్​ వ్యాధితో బాధపడుతున్నట్లు పేర్కొంటూ.. బెయిల్​ మంజూరు చేయాలని చిదంబరం కోరిన నేపథ్యంలో ఈ మేరకు నిర్ణయం తీసుకుంది న్యాయస్థానం.
బెయిల్​ పిటిషన్​పై న్యాయమూర్తి జస్టిస్​ సురేష్​ కైత్​ నేతృత్వంలోని ధర్మాసనం విచారణ చేపట్టింది. ఈ సందర్భంగా మెడికల్​ బోర్డు ఈ రోజు సమావేశమై చిదంబరం ఆరోగ్య పరిస్థితిపై చర్చించాలని.. రేపు కోర్టుకు నివేదిక అందించాలని సూచించింది. చిదంబరం కుటుంబ వైద్యుడు, హైదరాబాద్​కు చెందిన జీర్ణాశయ ప్రేగు వైద్య నిపుణులు డా. నాగేశ్వర్​ రెడ్డిని బోర్డు సభ్యుడిగా నియమించాలని ఆదేశించింది.

ఆరోగ్య పరిస్థితి క్షీణించిన నేపథ్యంలో... ఐఎన్​ఎక్స్​ మీడియా మనీ లాండరింగ్​ కేసులో మధ్యంతర బెయిల్​ మంజూరు చేయాలని కోరారు చిదంబరం. ఆరోగ్య పరిస్థితి నానాటికి క్షీణిస్తోందని, పరిశుభ్ర వాతావరణంలో ఉండాల్సిన అవసరం ఉందని కోర్టుకు తెలిపారు.

ఇదీ చూడండి: రాజకీయ పులిస్వారీ.. 'పీఠ'ముడి వీడేనా..!