దేశంలో కరోనా వేగంగా వ్యాప్తి చెందుతోంది. వైరస్ బారిన పడుతున్న వారి సంఖ్య రోజురోజుకు పెరిగిపోతోంది. దేశవ్యాప్తంగా ఇప్పటివరకు 452 మంది మహమ్మారికి బలయ్యారు. గత 24 గంటల్లో 1,076 కొత్త కేసులు, 32 మరణాలు నమోదైనట్లు కేంద్ర వైద్యఆరోగ్యశాఖ తెలిపింది.
వైరస్ ప్రభావం అధికంగా ఉన్న రాష్ట్రాల్లో..
- మహారాష్ట్రలో కొత్తగా 36 మందికి కరోనా పాజిటివ్గా తేలింది. మహమ్మారి బారిన పడ్డవారి సంఖ్య 3,236కు చేరింది. కొత్తగా నమోదైన కేసుల్లో అత్యధికంగా 23 మంది పుణెకు చెందినవారు కావడం గమనార్హం.
- గుజరాత్లో కొత్తగా 92 మందికి కరోనా పాజిటివ్ నిర్ధరణ అయ్యింది. రాష్ట్రవ్యాప్తంగా ఇప్పటివరకు 1000 మందికిపైగా వైరస్ బారిన పడ్డారు. శుక్రవారం ఇద్దరు మృతి చెందగా.. మహమ్మారి కారణంగా చనిపోయిన వారి సంఖ్య 38కి చేరింది.
- కర్ణాటకలో ఇవాళ 38 కరోనా కేసులు నమోదు కాగా.. వైరస్ బాధితుల సంఖ్య 353కు పెరిగింది. ఒక్కరోజులో అత్యధిక కేసులు నిర్ధరణ కావడం రాష్ట్రంలో ఇదే తొలిసారి. మహమ్మారి వల్ల ఇప్పటివరకు 13 మంది ప్రాణాలు కోల్పోయారు. 82 మంది కోలుకొని డిశ్చార్జి అయ్యారు.
- రాజస్థాన్లోనూ కరోనా విజృంభిస్తోంది. నేడు కొత్తగా 62 పాజిటివ్ కేసులు గుర్తించారు. వైరస్తో బాధపడుతున్న 56 ఏళ్ల వ్యక్తి మరణించగా.. రాష్ట్రంలో మృతుల సంఖ్య 17కు చేరింది.
- హరియాణాలోని నూహ్ జిల్లాలో 5, పంచకులాలో ఇద్దరికి కరోనా పాజిటివ్గా తేలగా.. రాష్ట్రంలో వైరస్ సోకిన వారి సంఖ్య 221కి పెరిగింది.
- అండమాన్ నికోబార్ దీవిలో పూల్ టెస్టింగ్లో తొలి కరోనా కేసు గుర్తించారు అధికారులు. పూల్ టెస్టింగ్ నిర్వహించిన నేపథ్యంలో ఓ ప్రభుత్వ అధికారికి పాజిటివ్గా నిర్ధరణ అయినట్లు పేర్కొన్నారు. అతని కుటుంబంలోని 9 మందిని క్వారంటైన్కు పంపినట్లు వెల్లడించారు.
