ప్రస్తుతం విరివిగా ఉపయోగిస్తున్న లిథియం-అయాన్ బ్యాటరీల కన్నా చౌకగా.. ఎక్కువ శక్తిని నిల్వ చేసే లిథియం-సల్ఫర్ బ్యాటరీలను భారత పరిశోధకులు తయారు చేశారు. ఇవి పర్యావరణ అనుకూలమైనవని చెప్పారు. బాంబే ఐఐటీ, శివ్ నాడర్ విశ్వవిద్యాలయ శాస్త్రవేత్తలు ఈ ఘనత సాధించారు.
ల్యాప్టాప్లు, మొబైల్ ఫోన్లు, స్మార్ట్ వాచీలు, విద్యుత్ కార్లకు లిథియం-అయాన్ బ్యాటరీలే ఆధారం. అయితే ఇంధన నిల్వ విషయంలో అవి సమర్థమైనవి కావు. అవి చాలా బరువు ఉంటాయి. ఖరీదు కూడా ఎక్కువ. ఈ బ్యాటరీలను రీసైకిల్ చేయడం కష్టం. వాటికి మండే స్వభావం కూడా ఉంది. ఇందుకు భిన్నంగా తాము రూపొందించిన లిథియం-సల్ఫర్ బ్యాటరీలో పర్యావరణ అనుకూల విధానాలు ఉన్నాయని శాస్త్రవేత్తలు తెలిపారు. ఇందులో పెట్రోలియం పరిశ్రమలో వెలువడే సల్ఫర్, వ్యవసాయ వ్యర్థాలు, జీడిపప్పు ప్రాసెసింగ్లో వెలువడే కార్డనాల్ వంటి కోపాలీమర్లు, ఈజెనాల్ తదితరాలను ఉపయోగించామన్నారు. ఇలాంటి బ్యాటరీలపై ఎక్కువగా ఆధారపడే టెక్ ఉపకరణాలు, డ్రోన్లు, విద్యుత్ వాహనాలకు ఇది ప్రయోజనం కలిగిస్తుందని తెలిపారు. ఈ తరహా బ్యాటరీలకు మూడు రెట్లు ఎక్కువ ఇంధన సాంద్రత ఉంటుందని పేర్కొన్నారు.
