ఈ ఏడాది జరిగే షాంఘై సహకార సంస్థ (ఎస్సీఓ) సభ్య దేశాల ప్రభుత్వాధినేతల మండలి వార్షిక సమావేశానికి భారత్ మొదటిసారి ఆతిథ్యం ఇవ్వనుంది. దిల్లీలో 4 రోజుల పర్యటనలో ఉన్న ఎస్సీఓ ప్రధాన కార్యదర్శి వ్లాదిమిర్ నొరోవ్.. విదేశాంగ మంత్రి జైశంకర్తో భేటీ తర్వాత ఈ ప్రకటన చేశారు.
పాక్ నుంచి వచ్చేదెవరు?
సాధారణంగా ప్రభుత్వాధినేతల మండలి సమావేశానికి చాలా దేశాలు విదేశాంగ మంత్రులనే పంపుతాయి. భారత్ తరఫున విదేశాంగ మంత్రి ప్రాతినిధ్యం వహిస్తూ వస్తున్నారు. కొన్ని దేశాలనుంచి వారి ప్రధానులు హాజరవుతారు.
ఎస్సీఓలో పాకిస్థాన్ కూడా సభ్య దేశంగా ఉంది. భారత్లో జరిగే సమావేశానికి పాక్ నుంచి ఎవరు హాజరవుతారనే విషయం ఆసక్తిగా మారనుంది.
సభ్య దేశాల సంతోషం
ఈ కార్యక్రమానికి ఆతిథ్యం ఇవ్వటం పట్ల ఎస్సీఓ సభ్య దేశాలు సంతోషం వ్యక్తం చేశాయని నొరోవ్ తెలిపారు. యూరేసియా ప్రాంతంలో భారత్ కీలకమైన దేశమని ఆయన పేర్కొన్నారు.
చైనా ఆధిపత్యం ఉండే ఎస్సీఓలో 2005లో పరిశీలక దేశంగా చేరిన భారత్.. 2017లో సభ్య దేశంగా మారింది. ఎస్సీఓతో భద్రత పరమైన అంశాలతో పాటు ప్రాంతీయ ఉగ్రవాద నిరోధక విభాగం (ఆర్ఓటీఎస్)తో కీలకంగా వ్యవహరిస్తోంది.
8 వింతల్లో ఐక్యతా విగ్రహానికి చోటు
ఎస్సీఓ సభ్య దేశాల్లోని 8 వింతల జాబితాలో భారత్లోని ఐక్యతా విగ్రహానికి చోటు కల్పించింది. ఈ విషయాన్ని ట్విట్టర్ ద్వారా తెలిపిన జైశంకర్.. ఎస్సీఓ చర్యను అభినందించారు.
ఇదీ చూడండి : 40వేల కిమీ.. 1500 అమర జవాన్ల కుటుంబాలు.. ఓ బాలుడు
