ఒకప్పుడు అమెరికా, ఇటలీలో రోజువారీ కేసుల సంఖ్యను చూసి ప్రపంచం బెంబేలెత్తిపోయింది. చూస్తుండగానే బాధితుల సంఖ్య విషయంలో అమెరికా అగ్రస్థానానికి చేరుకుంది. ఆ వెంటే బ్రెజిల్ నిలిచింది. కానీ ఇప్పుడు అందరి చూపు భారత్పైనే. కరోనా కట్టడిలో ఒకప్పుడు ప్రశంసలు అందుకున్న దేశం.. ఇప్పుడు రోజువారీ కేసుల రేసులో అమెరికా, బ్రెజిల్ను వెనక్కి నెడుతోంది. ఇదే కొనసాగితే.. పరిస్థితులు అత్యంత దారుణంగా మారతాయని నిపుణులు హెచ్చరిస్తున్నారు.
రోజువారీ కేసుల్లో...
దేశంలో సోమవారం ఒక్కరోజులో 57,982 కొత్త కేసులు నమోదయ్యాయి. మరో 941మంది వైరస్ కారణంగా ప్రాణాలు కోల్పోయారు. మొత్తం కేసుల సంఖ్య 26,47,664కి చేరింది. ఇప్పటివరకు మరణించిన వారి సంఖ్య 50,921కి పెరిగింది. అమెరికాలో ఇప్పటివరకు 55,67,765.. బ్రెజిల్లో 33,40,197 కేసులు నమోదయ్యాయి.
కానీ దేశంలో కరోనా కేసులు గత వారం నుంచి ఆందోళనకరంగా పెరుగుతున్నాయి. వారం రోజుల పాటు... రోజువారీ కేసుల సంఖ్యలో అమెరికా, బ్రెజిల్ కన్నా భారత్ ముందు వరుసలో నిలిచింది. ప్రతిరోజు సగటున 60వేల కేసులు నమోదవుతున్నట్టు గణాంకాలు స్పష్టం చేస్తున్నాయి. ఈ సంఖ్య.. అమెరికా, బ్రెజిల్ కన్నా చాలా ఎక్కువ.
ఇదీ చూడండి:- ప్రభుత్వ బాలికల ఆశ్రమంలో 90 మందికి కరోనా
అమెరికాలో కేసులు తగ్గుతున్నాయి. బ్రెజిల్లో బాధితుల సంఖ్య నిలకడగా ఉంది. కానీ భారత్లో మాత్రం పరిస్థితులు భిన్నంగా ఉన్నాయి. ప్రపంచంలోనే ఎక్కడా లేని విధంగా.. వారం రోజుల సగటులో భారత్ అగ్రస్థాంలో నిలిచింది. పెరుగుతున్న కేసుల సంఖ్యను చూస్తే.. రానున్న రోజుల్లో క్లిష్ట పరిస్థితులు ఎదుర్కోక తప్పదని స్పష్టమవుతోంది.
రెట్టింపు శాతంలోనూ...
దేశంలో వైరస్ కేసుల రెట్టింపు శాతం కూడా భయానకంగా ఉంది. ప్రతి 24 రోజులకు కేసులు రెట్టింపవుతున్నాయి. ఈ విషయంలోనూ భారత్కు.. బ్రెజిల్(47రోజులు), అమెరికా(65) మధ్య చాలా వ్యత్యాసం ఉంది.
కేసుల 'రికార్డు...'
నిజానికి కరోనా కట్టడి విషయంలో భారత్కు సర్వత్రా ప్రశంసలు లభించాయి. ఎన్నో దేశాలకు భారత్ ఆదర్శంగా నిలిచింది. కానీ ఒక్కసారిగా పరిస్థితులు మారిపోయాయి.
ఇదీ చూడండి:- ఇకపై లాలాజలం నమూనాతో కరోనా నిర్ధరణ!
అమెరికాలో జులై 22న ఒక్కరోజే అత్యధికంగా 67 వేల కేసులు నమోదయ్యాయి. ఆ దేశంలో ఇప్పటివరకు ఇదే రికార్డు. భారత్లో గత గురువారం 66,999 కేసులు నమోదయ్యాయి. ఇంకా వైరస్ ఉద్ధృతి తగ్గుముఖం పట్టకపోవడం వల్ల అమెరికా రికార్డును అతి త్వరలోనే భారత్ అధిగమిస్తుందని నిపుణులు తేల్చిచెబుతున్నారు. పరిస్థితులు ఇలాగే ఉంటే భారత్ కరోనా వైరస్ హబ్గా మారుతుందని హెచ్చరిస్తున్నారు.
రికవరీల్లోనూ రికార్డు...
దేశంలో కేసుల సంఖ్యతో పాటు రికవరీలు కూడా పెరుగుతున్నాయి. తాజాగా 24గంటల వ్యవధిలో రికార్డు స్థాయిలో 57,584మంది బాధితులు కరోనాను జయించి ఆసుపత్రుల నుంచి డిశ్చార్జ్ అయ్యారు. ఇప్పటివరకు కరోనా నుంచి 19,19,842 మంది(72శాతంపైనే) కోలుకున్నారు.
3 కోట్ల పరీక్షలు...
దేశవ్యాప్తంగా కరోనా పరీక్షల సంఖ్య 3 కోట్లు దాటింది. ఆదివారం నాటికి మొత్తం మీద 3,00,41,400మందికి కరోనా పరీక్షలు నిర్వహించినట్టు ఐసీఎమ్ఆర్(భారత వైద్య పరిశోధన మండలి) ప్రకటించింది. ఆదివారం ఒక్కరోజే 7,31,697 పరీక్షలు నిర్వహించినట్టు స్పష్టం చేసింది.
ఇదీ చూడండి:- మహమ్మారి నేర్పిన సైకిల్‌ సవారీ
