దేశ రాజధాని దిల్లీని కరోనా పట్టి పీడిస్తోంది. రోజురోజుకీ కరోనా బాధితుల సంఖ్య పెరుగుతోంది. సరిపడా సౌకర్యాలు లేక ప్రజలు తిప్పలు పడుతున్నారు. ఈ నేపథ్యంలో ఆసుపత్రుల్లో పడకలు, వెంటిలేటర్ల సంఖ్య పెంచాలని కేంద్రానికి, దిల్లీ ప్రభుత్వానికి ఆదేశాలిచ్చింది దిల్లీ హైకోర్టు.
దక్షిణ దిల్లీలోని డిఫెన్స్ కాలనీలో కంటెయిన్మెంట్ మార్గదర్శకాలు సక్రమంగా అమలయ్యేలా చర్యలు తీసుకోవాలని మృదుల్ చక్రవర్తి సహా పలువురు న్యాయవాదులు పిటిషన్ వేశారు. దేశ రాజధాని ఆసుపత్రుల్లో సరైన వసతులు లేక రోగులు ఇక్కట్లు పడుతున్నారని హైకోర్టుకు నివేదించారు. ఈ కేసు విచారణ సందర్భంగా ప్రస్తుత పరిస్థితిపై దిల్లీ ప్రభుత్వాన్ని ప్రశ్నించింది న్యాయస్థానం. "దిల్లీలో జూన్ 9 వరకు 9, 179 పడకలు అందుబాటులో ఉండగా.. నాలుగు రోజుల్లోనే 4,914 మంచాలు భర్తీ అయ్యాయి. 569 వెంటిలేటర్లు అందుబాటులో ఉండగా... వాటిలో 315 వెంటిలేటర్లు చికిత్స మేరకు ఉపయోగిస్తున్నారు" అని తెలిపింది ఆ రాష్ట్ర ప్రభుత్వం.
ఆసుపత్రులు తమ వద్ద ఎన్ని పడకలు అందుబాటులో ఉన్నాయో ఎప్పటికప్పుడు పక్కా సమాచారం ఇవ్వాలని... అప్పుడే బాధితులు తాము ఏ ఆసుపత్రికి వెళ్లాలో నిర్ణయించుకుంటారని పేర్కొంది దిల్లీ హైకోర్టు.
ఇదీ చదవండి:వారికి స్మార్ట్ఫోన్లే లేవ్- మరి ఆన్లైన్లో చదువెలా?
