రూట్​ మార్చిన సెల్​ఫోన్​ దొంగలు - ఫోన్​ కొట్టేశారో యూపీఐతో బ్యాంకు ఖాతాలు ఖాళీ

హైదరాబాద్​లో పెరిగిన చరవాణీ చోరీ కేసులు - కొట్టేసిన మొబైల్ యూపీఐ బ్యాంక్‌ ఖాతా నుంచి నగదు కాజేస్తున్న దుండగులు

Mobile Theft in Hyderabad : మనిషి జీవితంలో మొబైల్​ఫోన్ ఒక భాగమైపోయింది. ఈ కాలంలో సెల్​ఫోన్ లేనిదే ఎవరూ అడుగు బయటపెట్టట్లేదు. యువత అప్పుచేసి మరీ ఖరీదైన సెల్​ఫోన్లు కొంటున్నారు. అలాంటి సెల్​ఫోన్​ చోరీ జరిగితే ఆ బాధను చెప్పడానికి మాటలు రావు. రాష్ట్రంలో ఇటీవల చరవాణీ చోరీ కేసులు అధికంగా నమోదు అవుతున్నట్లు గణాంకాలు చెబుతున్నాయి. చోరీ చేసిన సెల్​ఫోన్​లలో దుండగులు తెలివిగా యూపీఐ ద్వారా బ్యాంకు ఖాతాలోని నగదును కాజేస్తున్నట్లు పోలీసులు తెలిపారు. ఈ క్రమంలో ప్రజలు తగు జాగ్రత్తలు ముందుగానే తీసుకుంటే మంచిదని పోలీసులు సూచిస్తున్నారు.

ఇలా అపహరించిన ఫోన్లను అన్​లాక్​ చేయించేందుకు నేరగాళ్లు నగరంలోని కొన్ని మొబైల్​ దుకాణాల్లోని వ్యక్తులను అనుచరులుగా మార్చుకుంటున్నారు. ఫోన్​ అన్​లాక్​ కాగానే తొలుత ఖాతాల్లోని డబ్బులు ఖాళీ చేసేస్తున్నారు. బ్యాంకు సిబ్బందికి కస్టమర్లుగా కాల్‌చేసి పాస్‌వర్డ్‌ తెలుసుకుంటున్నారు. దుకాణాలు, హోటళ్లు, పెట్రోల్ బంకుల వద్ద చేరి అత్యవసరంగా డబ్బు కావాలంటూ జాలిగా మాట్లాడతారు. డెబిట్ కార్డులు మరచిపోయామని యూపీఐ నుంచి నగదు బదిలీ చేస్తామని ఏటీఎం నుంచి తీసిస్తే చాలంటూ ప్రాధేయపడతారు. ఇదంతా నిజమని భావించి కొందరు డబ్బు తీసి నేరగాళ్లకు ఇస్తున్నారు.

రైలులో ప్రయాణిస్తున్న వ్యక్తి ఫోన్‌ మాయం : ఆంధ్రప్రదేశ్‌ నుంచి హైదరాబాద్‌కి రైలులో ప్రయాణిస్తున్న వ్యక్తి ఫోన్‌ని దుండగులు మాయం చేశారు. సికింద్రాబాద్ రైల్వేస్టేషన్‌కు చేరాక గుర్తించిన బాధితుడు రైల్వే పోలీసులకు ఫిర్యాదు చేశాడు. ఫోన్ బ్లాక్ చేసేలోపు అతడి యూపీఐ ఖాతాలోని రూ.1.40 లక్షలు మాయమయ్యాయి. కంటోన్మెంట్ ప్రాంతానికి చెందిన ఓ ప్రైవేట్‌ ఉద్యోగి సిటీ బస్సులో కార్యాలయానికి బయల్దేరారు. మార్గమధ్యంలో చరవాణీ చోరీకి గురైంది. సమీపంలోని పోలీస్‌స్టేషన్లో ఫిర్యాదు చేసేందుకు వెళ్లేలోపే అతడి ఖాతాలోని రూ.1.50 లక్షలు మాయమైంది.

సెల్‌ఫోన్‌ చోరీ ఫిర్యాదులు : రైల్వే స్టేషన్లు, బస్టాండ్లు, రైతుబజార్లు ఇలా జనసమూహం ఎక్కువగా ఉన్న ప్రాంతాల్లో ఫోన్ల చోరీలు ఎక్కువగా జరుగుతున్నట్లు పోలీసులు చెబుతున్నారు. గ్రేటర్ పరిథిలోని మూడు పోలీస్‌ కమిషనరేట్స్‌లో ప్రతి నెలా 500 నుంచి 600 వరకి సెల్‌ఫోన్‌ చోరీ ఫిర్యాదులు నమోదవుతున్నట్లు తెలుస్తోంది. కొన్నింటిని గుర్తించి బాధితులకు అందిస్తున్నా కేసుల సంఖ్య తగ్గడం లేదు. రద్దీ ప్రదేశాలకు వెళ్లినప్పుడు ఫోన్లని జాగ్రత్తగా ఉంచుకోవాలని పోలీసులు సూచిస్తున్నారు.