బుధవారం ఉదయం నాటికి దేశవ్యాప్తంగా ఉన్న హాట్స్పాట్(రెడ్ జోన్లు) జిల్లాల సంఖ్య 129కి పడిపోయింది. రెండు వారాల క్రితం ఆ సంఖ్య 170గా ఉంది. అదే సమయంలో గ్రీన్ జోన్లు 325 నుంచి 307కు తగ్గాయి. అయితే ఈ రెండు వారాల వ్యవధిలో ఆరెంజ్ జోన్లు 207నుంచి 297కు చేరాయి.
కరోనా వైరస్ వ్యాప్తి రేటు అధికంగా ఉన్నా లేక కేసుల సంఖ్య భారీగా నమోదవుతున్నా ఆ ప్రాంతాలను రెడ్ జోన్లుగా పరిగణిస్తారు. కొంతమేర తక్కువగా కేసులుంటే ఆరెంజ్ జోన్ అని.. అసలు కరోనా కేసులే లేని జిల్లాలను గ్రీన్జోన్లుగా పిలుస్తారు.
రెడ్ జోన్లలో 28, ఆరెంజ్ జోన్లలో 14 రోజులపాటు ఎలాంటి కేసులు నమోదుకాకపోతే.. ఆ ప్రాంతాలను గ్రీన్జోన్ల జాబితాలో చేరుస్తారు.
ఏప్రిల్ 15న.. దేశవ్యాప్తంగా ఉన్న 25 రాష్ట్రాలు, కేంద్రపాలిత ప్రాంతాల్లోని 170 జిల్లాలను హాట్స్పాట్లుగా ప్రకటించింది ప్రభుత్వం.
కేసులు నమోదు కాని జిల్లాల సంఖ్య(రోజుల్లో)
- 7 రోజులు - 80 జిల్లాలు
- 14 రోజులు - 47 జిల్లాలు
- 2 రోజులు - 39 జిల్లాలు
- 28 రోజులు - 17 జిల్లాలు
కేసుల తీవ్రత అధికంగా ఉన్న ప్రాంతాలు...
వడోదర(గుజరాత్), కర్నూల్(ఆంధ్రప్రదేశ్), భోపాల్(మధ్యప్రదేశ్), జోధ్పుర్(రాజస్థాన్), ఆగ్రా(ఉత్తరప్రదేశ్), ఠాణె(మహారాష్ట్ర), చెన్నై(తమిళనాడు), సూరత్(గుజరాత్), హైదరాబాద్(తెలంగాణ), పుణె(మహారాష్ట్ర), జైపుర్(రాజస్థాన్), ఇండోర్(మధ్యప్రదేశ్), అహ్మదాబాద్(గుజరాత్), ముంబయి(మహారాష్ట్ర), దిల్లీలో కేసులు ఎక్కువగా నమోదవుతున్నాయని తెలిపారు కేంద్ర ఆరోగ్య శాఖ అధికారులు.
కరోనాపై భారత్ విజయం సాధించాలంటే ఈ ప్రాంతాలపై ఎక్కువ దృష్టిసారించాలని అధికారులు వెల్లడించారు. పరీక్షలు ఎక్కువగా జరపాలన్నారు.
ఇదీ చూడండి:- ప్లాస్మా థెరపీపై ఎయిమ్స్ క్లినికల్ ట్రయల్
