అయోధ్య, రఫేల్​, రాహుల్​పై సుప్రీం విచారణ నేడే

రఫేల్​ తీర్పు సమీక్షించాలన్న పిటిషన్లపై నేడు విచారణ చేపట్టనుంది సుప్రీంకోర్టు. ఇప్పటికే ఇందుకు సంబంధించి కేంద్రం, పిటిషనర్లు ప్రమాణపత్రాలు దాఖలు చేశారు. రాహుల్​ గాంధీపై భాజపా నేత మీనాక్షి లేఖీ దాఖలు చేసిన కోర్టు ధిక్కరణ పిటిషన్​పైనా నిర్ణయం తీసుకోనుంది సుప్రీం. ఈ అంశంలో ఇప్పటికే కోర్టుకు క్షమాపణలు చెప్పారు రాహుల్​. అయోధ్య కేసునూ నేడు విచారించనుంది అత్యున్నత న్యాయస్థానం.

రఫేల్​ యుద్ధ విమానాల కొనుగోలు ఒప్పందంపై ఇచ్చిన తీర్పును సమీక్షించాలంటూ దాఖలైన వ్యాజ్యాలను సుప్రీంకోర్టు నేడు విచారించనుంది. రఫేల్​ ఒప్పందంపై డిసెంబర్​ 14న ఇచ్చిన తీర్పును సమీక్షించాలని మాజీ కేంద్ర మంత్రులు యశ్వంత్​ సిన్హా, అరుణ్​ శౌరి, న్యాయవాది ప్రశాంత్​ భూషణ్​ పిటిషన్లు వేశారు. ఇప్పటికే ఇందుకు సంబంధించి కేంద్ర ప్రభుత్వం, పిటిషనర్లు అత్యున్నత న్యాయస్థానంలో ప్రమాణపత్రాలు దాఖలు చేశారు.

రఫేల్​ యుద్ధ విమానాల కొనుగోలు విషయంలో సుప్రీంకోర్టుకు కేంద్రం అసత్య సమాచారాన్ని సమర్పించిందని పిటిషనర్లు ప్రమాణపత్రంలో ఆరోపించారు. దీనిపై కేంద్రం స్పందించింది. పిటిషనర్లే కోర్టును తప్పుదోవ పట్టిస్తున్నారని ప్రమాణపత్రం​ దాఖలు చేసింది. మీడియా కథనాలు, అసంపూర్ణ సమాచారాల ఆధారంగా వ్యాజ్యాలు వేశారని విమర్శించింది.

ఇదీ చూడండి : 'కేంద్రం తప్పుదోవ పట్టించింది..' 'కాదు పిటిషనర్లే!'

రాహుల్​ 'ధిక్కరణ'పై విచారణ

కాంగ్రెస్​ అధ్యక్షుడు రాహుల్​ గాంధీపై దాఖలైన కోర్టు ధిక్కరణ పిటిషన్​ను నేడు విచారించనుంది సుప్రీంకోర్టు. 'చౌకీదార్‌ చోర్‌' వ్యాఖ్యలను సుప్రీంకోర్టుకు తప్పుగా ఆపాదించినందుకు కాంగ్రెస్‌ అధ్యక్షుడు రాహుల్‌గాంధీ సర్వోన్నత న్యాయస్థానానికి ఇప్పటికే బేషరతు క్షమాపణలు చెప్పారు. తాను ఈ వ్యాఖ్యలను ఉద్దేశపూర్వకంగా చేయలేదని పేర్కొంటూ ప్రమాణపత్రాలు దాఖలు చేశారు.

కాపలాదారే దొంగ అని రఫేల్​ తీర్పులో సుప్రీంకోర్టే చెప్పిందని గతంలో రాహుల్​ గాంధీ వ్యాఖ్యానించారు. ఈ వ్యాఖ్యలపై అభ్యంతరం వ్యక్తం చేస్తూ భాజపా నేత మీనాక్షి లేఖి అత్యున్నత న్యాయస్థానంలో రాహుల్​పై కోర్టు ధిక్కరణ పిటిషన్​ వేశారు. కోర్టు సైతం వ్యాఖ్యలను తప్పుగా ఆపాదించారని అభిప్రాయపడుతూ రాహుల్​కు నోటీసులు జారీ చేసింది.

ఇదీ చూడండి : సుప్రీంకు రాహుల్​ బేషరతు క్షమాపణలు

అయోధ్య కేసుపై ...

అయోధ్య రామజన్మ భూమి-బాబ్రీ మసీదు భూ వివాదం కేసుపై సుప్రీంకోర్టు నేడు విచారణ చేపట్టనుంది. వివాద పరిష్కారానికి మధ్యవర్తుల ప్యానెల్​ ఏర్పాటు తర్వాత తొలిసారి కేసును విచారించనుంది అత్యున్నత న్యాయస్థానం. ప్రధాన న్యాయమూర్తి నేతృత్వంలోని ఐదుగురు సభ్యుల ధర్మాసనం ఈ కేసులో వాదనలను విననుంది.

అయోధ్య రామజన్మభూమి-బాబ్రీ మసీదు వివాదం పరిష్కారం కోసం మార్చి 8న మధ్యవర్తుల ప్యానెల్​ను నియమించింది సుప్రీంకోర్టు. సుప్రీం విశ్రాంత న్యాయమూర్తి జస్టిస్​ ఎఫ్ఎం ఖలీఫుల్లా నేతృత్వం వహిస్తున్న ఈ ప్యానెల్​లో ఆధ్మాత్మిక గురువు శ్రీ శ్రీ రవిశంకర్, సీనియర్ న్యాయవాది శ్రీరాం పంచూ సభ్యులు​గా ఉన్నారు.

ఇదీ చూడండి : అయోధ్యపై మధ్యవర్తిత్వం ప్రారంభం