కశ్మీర్ లోయలో దాదాపు 72 రోజుల విరామం తర్వాత మొబైల్ ఫోన్లు మోగడం ప్రారంభమయ్యాయి. అయితే ఈ ఆనందం ప్రజలకు ఎంతోసేపు నిలవలేదు. ఉగ్రవాదుల బీభత్సం నేపథ్యంలో కొద్దిసేవటికే ఎస్ఎంఎస్ సేవలను నిలిపివేశారు అధికారులు.
ఓ పాకిస్థాన్ జాతీయుడు సహా మరో ఉగ్రవాది కశ్మీర్లో అలజడి సృష్టించారు. పోస్ట్పెయిడ్ సేవలు ప్రారంభమైన కొద్దిసేపటికే ఇద్దరు ఉగ్రవాదులు రాజస్థాన్కు చెందిన ట్రక్కు డ్రైవర్ను దారుణంగా హత్య చేశారు. యాపిల్ తోటల యజమానిపై తీవ్రంగా దాడికి పాల్పడ్డారు. ఈ ఘటన జరిగిన అనంతరం ఎస్ఎంఎస్ సేవలను నిలిపివేస్తూ అధికారులు నిర్ణయం తీసుకున్నారు. మొబైల్ ఫోన్ సేవలను కేవలం పోస్ట్పెయిడ్ వాయిస్ కాల్స్కు మాత్రమే పరిమితం చేశారు.
బిల్లులు చెల్లించడానికి బారులు తీరిన ప్రజలు
పోస్ట్పెయిడ్ సేవల పునరుద్ధరణతో కశ్మీర్ ప్రజలు తమ కుటుంబ సభ్యులతో మాట్లాడుకున్నారు. సేవలు ప్రారంభమైనప్పటికీ బిల్లులు చెల్లించకపోవడం వల్ల కొంతమంది మొబైల్ కనెక్షన్లను టెలికాం సంస్థలు నిలిపివేశాయి. సేవల పునరుద్ధరణ కోసం బకాయిలు చెల్లించడానికి కార్యాలయాల వద్ద ప్రజలు బారులు తీరారు.
అంతర్జాల సేవలను వీలైనంత త్వరగా పునరుద్ధరిస్తామని జమ్ము కశ్మీర్ గవర్నర్ సత్యపాల్ మాలిక్ తెలిపారు. అయితే పూర్తి స్థాయిలో సేవల పునరుద్ధరణకు రెండు నెలల సమయం పడుతుందని అధికారులు అంచనా వేస్తున్నారు.
