దేశవ్యాప్తంగా పెను దుమారం రేపిన హాథ్రస్ ఘటనపై అనూహ్య ప్రకటన చేశారు ఉత్తర్ప్రదేశ్ పోలీసులు. బాధితురాలి గొంతు నులమడం వల్ల మరణించినట్లు ఫోరెన్సిక్ నివేదిక ద్వారా స్పష్టమైందని తెలిపారు. ఆమెపై అత్యాచారం జరిగినట్లు నివేదికలో పేర్కొనలేదని యూపీ శాంతిభద్రతల విభాగం ఏడీజీ ప్రశాంత్‌కుమార్‌ వెల్లడించారు.
"గొంతు నులమడం వల్ల, తీవ్ర వేదనకు గురికావడం వల్ల ఆమె చనిపోయినట్లు దిల్లీ నుంచి వచ్చిన పోస్టుమార్టం నివేదికలో ఉంది. తర్వాత ఫోరెన్సిక్ నివేదిక కూడా మాకు అందింది. వారు సేకరించిన నమూనాలో స్పెర్మ్‌ లేదా శుక్ర కణాలు లేవని స్పష్టమైంది.
దీనిని బట్టి కొందరు ఉత్తర్ప్రదేశ్లో కులం పేరిట అలజడి సృష్టించేందుకే.. ఈ చర్యలకు పాల్పడ్డారని స్పష్టంగా తెలుస్తోంది. ఈ కేసులో పోలీసులు మొదటి నుంచి వేగవంతమైన, నిర్దిష్ట సమయంలో విచారణ జరిపారు. విచారణ కొనసాగించి., తప్పుడు ప్రచారం చేసినవారిని గుర్తిస్తాం."
- ప్రశాంత్‌కుమార్‌, ఏడీజీ, యూపీ శాంతిభద్రతల విభాగం
వివరణ కోరిన మహిళా కమిషన్..
బాధితురాలి మృతదేహానికి అత్యవసరంగా అంత్యక్రియలు ఎందుకు నిర్వహించారని జాతీయ మహిళా కమిషన్.. పోలీసులను ప్రశ్నించింది. కుటుంబ సభ్యులు లేకుండానే అర్ధరాత్రి 2.30 గంటలకు దహన సంస్కారాలు నిర్వహించటంపై ఆగ్రహం వ్యక్తం చేసింది. ఇలా ఎందుకు చేశారో వివరణ ఇవ్వాలని పోలీసులను ఆదేశించింది.
కుటుంబ సభ్యుల కోరికే మేరకే యువతి అంత్యక్రియలు నిర్వహించామని స్థానిక పోలీసులు తెలిపారు.
కాంగ్రెస్ నేతలు అరెస్ట్
హాథ్రస్ బాధితురాలి కుటుంబాన్ని పరామర్శించేందుకు కాంగ్రెస్ నేతలు చేపట్టిన పర్యటన ఉద్రిక్తతలకు దారి తీసింది. అగ్రనేతలు రాహుల్ గాంధీ, ప్రియాంక గాంధీ వాహన శ్రేణిని పోలీసులు అడ్డుకున్న కారణంగా కాలినడకన హాథ్రస్ వెళ్లేందుకు యత్నించారు. ఈ క్రమంలో పోలీసులతో జరిగిన జరిగిన తోపులాటలో రాహుల్ గాంధీ కిందపడిపోయారు.
అనంతరం రాహుల్, ప్రియాంకతో పాటు సుర్జేవాలా, అధీర్ రంజన్ చౌదురిని అరెస్టు చేసి గౌతమ్ బుద్ధ నగర్కు తరలించారు. కాసేపటి తర్వాత విడిచిపెట్టారు.
ఇదీ చూడండి: హాథ్రస్ పర్యటనలో హైడ్రామా- రాహుల్ అరెస్టు
దేశవ్యాప్తంగా నిరసనలు..
హాథ్రస్ ఘటనపై దేశవ్యాప్తంగా నిరసనలు కొనసాగుతున్నాయి. ఉత్తర్ప్రదేశ్లో పలు సామాజిక సంఘాలు భారీ ర్యాలీలు నిర్వహించాయి.
హరియాణాలోనూ పలు ప్రాంతాల్లో నిరసన ర్యాలీలు చేపట్టారు. దోషులకు మరణశిక్ష విధించాలని డిమాండ్ చేశారు. ఈ నిరసనల్లో ఉత్తర్ప్రదేశ్ ప్రభుత్వ దిష్టిబొమ్మను దగ్ధం చేశారు. భాజపాకు వ్యతిరేకంగా నినాదాలు చేశారు.
హాథ్రస్ బాధితురాలికి న్యాయం చేయాలని బంగాల్లో కాంగ్రెస్ కార్యకర్తలు డిమాండ్ చేశారు. కోల్కతాలో భారీ ర్యాలీ నిర్వహించారు.
ఏం జరిగింది?
సెప్టెంబర్ 14న తల్లితో కలిసి పొలానికి వెళ్లిన యువతి అదృశ్యమైంది. తర్వాత తీవ్ర గాయాలతో ఉన్న ఆమెను గుర్తించగా నాలుక తెగిపడి, మెడ విరిచినట్లు ఉండడాన్ని గుర్తించారు. బాధితురాలిని అలీగఢ్‌ ముస్లిం విశ్వవిద్యాలయానికి చెందిన జవహర్‌లాల్‌నెహ్రూ మెడికల్‌ కళాశాల ఆస్పత్రికి తరలించి చికిత్స చేయించారు.
అయినప్పటికీ పురోగతి లేకపోవటం వల్ల తర్వాత దిల్లీలోని సఫ్దర్‌జంగ్ ఆస్పత్రికి తరలించారు. మంగళవారం ఆమె తుదిశ్వాస విడిచింది. అనంతరం, బాధితురాలి మృతదేహానికి అర్ధరాత్రి తల్లిదండ్రులు లేకుండా అంత్యక్రియలు నిర్వహించారు పోలీసులు.
ఇదీ చూడండి: యూపీలో మరో రేప్- విషం తాగిన బాధితురాలు
