ఇకపై ద్విచక్ర వాహన ప్రమాదాల్లో ప్రాణనష్టాన్ని నివారించొచ్చని చెబుతోంది హిమాచల్ప్రదేశ్కు చెందిన ప్రగతి శర్మ. గుజరాత్ గాంధీనగర్లోని నేషనల్ ఇన్స్టిట్యూట్ ఆఫ్ ఫ్యాషన్ టెక్నాలజీలో చదువుతోన్న ఆమె 'లైఫ్ సేవింగ్ జాకెట్'ను రూపొందించింది. దీనిని మామూలు జాకెట్లా ధరించొచ్చు. ప్రమాదం జరిగినప్పుడు అది స్వయంచాలితంగా ఎయిర్ బ్యాగులా పనిచేస్తుంది.
జాకెట్ తయారు చేసే ముందు ప్రగతి జీవితంలో అనుకోని ఘటన ఎదురైంది. ఛండీగఢ్లో తన స్నేహితుడు ద్విచక్రవాహన ప్రమాదంలో మరణించాడు. తన స్నేహితుడిలా ఎవరూ మరణించొద్దని అనుకుంది. ఎయిర్ బ్యాగ్ లాంటి జాకెట్ తయారు చేయాలని నిర్ణయించుకుంది. అందుకోసం ఎన్నో సవాళ్లను ఎదుర్కొంది. చివరకు ఆమె సంకల్ప బలమే తనకు విజయాన్ని సాధించిపెట్టింది.
" నా స్నేహితుడు అంకుస్ మృతితో ఈ జాకెట్ తయారు చేయాలనే ఆలోచన వచ్చింది. ద్విచక్రవాహనంపై వెళుతున్నప్పుడు రోడ్డు ప్రమాదంలో మరణించాడు. నాకు ఉన్న నైపుణ్యాలు, అనుభవంతో రోడ్డు ప్రమాదాల్లో ప్రాణనష్టాన్ని తగ్గించే జాకెట్ తయారు చేయాలనుకున్నా. జాకెట్ తయారీ పూర్తి చేసేందుకు కాలేజీ నుంచి మూడు నెలల సమయం దొరికింది. తయారీలో 25 సార్లు విఫలమయ్యాను. మా నిఫ్ట్ కళాళాల అధ్యాపకురాలు ఆర్తి సొనంది నాకు సహాయం చేశారు. మూడు నెలల తరువాత జాకెట్ను విజయవంతంగా తయారు చేశాను. మార్కెట్లోకి తీసుకొచ్చేందుకు ప్రయత్నిస్తున్నా."
- ప్రగతి శర్మ, నిఫ్ట్ విద్యార్థిని, గాంధీనగర్
జాకెట్ విలువ సుమారు రూ.10 వేలు ఉంటుందని తెలిపింది ప్రగతి. జాకెట్ ధరించి ద్విచక్రవాహనంపై నిశ్చింతగా వెళ్లొచ్చనేది తన అభిప్రాయం. ఆగస్టులో దేశ రాజధాని దిల్లీలో ఈ జాకెట్ను ప్రదర్శించనున్నట్లు చెప్పింది.
ఇదీ చూడండి: బగ్ గుర్తించాడు- పేరు, డబ్బు సంపాదించాడు
