బిహార్ ముజఫర్పుర్లో అనుమానిత అక్యూట్ ఎన్సెఫాలిటిస్ సిండ్రోమ్ (ఏఈఎస్) బారినపడి మరణించిన చిన్నారుల సంఖ్య 104కు చేరిన నేపథ్యంలో చర్యలు చేపట్టారు కేంద్ర ఆరోగ్య శాఖ మంత్రి హర్షవర్ధన్. వెంటనే ముజఫర్పుర్లో 'స్టేట్ ఆఫ్ ది ఆర్ట్ మల్టీ డిసిప్లీనరీ రీసర్చ్ సెంటర్' ఏర్పాటు చేసేందుకు మరో ఉన్నత స్థాయి వైద్యుల బృందాన్ని పంపాలని ఆదేశించారు.
బిహార్లో పర్యటించిన అనంతరం కేంద్ర ఆరోగ్య శాఖ, భారతీయ వైద్య పరిశోధన మండలి (ఐసీఎమ్ఆర్), ఎయిమ్స్కు చెందిన సీనియర్ అధికారులతో రాష్ట్రంలోని పరిస్థితులపై సమీక్షించారు హర్షవర్ధన్.
" వ్యాధికి గల కారణాన్ని తెలుసుకునేందుకు ఉన్నత స్థాయి పరిశోధనా బృందం అవసరం. ఏఈఎస్ తో బాధపడుతున్న పిల్లలను ఈ బృందం పరిశీలిస్తుంది. వ్యాధి కాలం, పరివర్తన, పర్యావరణ కారకాలు, మెట్రోలాజికల్ డేటా, ఇతర కారణాలను పరిగణనలోకి తీసుకుని పరిష్కారాన్ని సూచిస్తుంది. "
- హర్షవర్ధన్, కేంద్ర ఆరోగ్య శాఖ మంత్రి
బిహార్లోని 5 జిల్లాల్లో వైరోలాజికల్ ల్యాబ్స్ ఏర్పాటు చేస్తామని తెలిపారు కేంద్ర మంత్రి. రాష్ట్ర ప్రభుత్వంతో చర్చించి అవసరమైన జిల్లాలను ఎంపిక చేయనున్నట్లు పేర్కొన్నారు.
బృందంలో హైదరాబాద్ వైద్యులు...
పరిశోధన బృందంలో హైదరాబాద్లోని జాతీయ మలేరియా, శిశుపోషణ వైద్య కళాశాల వైద్యులు ఉన్నారు. వారితో పాటు దిల్లీ ఐసీఎమ్ఆర్, బెంగళూరులోని ఎన్ఐఎమ్హెచ్ఏఎన్ఎస్, పుణెకు చెందిన జాతీయ వైరాలజీ వైద్య కళాశాల, చెన్నైలోని జాతీయ ఎపిడమియోలజీ ఇన్స్టిట్యూట్, దిల్లీ ఎయిమ్స్కు చెందిన వైద్యులు ఉన్నారు.
ఇదీ చూడండి: బిహార్: 104కు చేరిన 'ఏఈఎస్' మృతులు
