'ఆయుష్మాన్​ చెల్లదని పేదవాడి ప్రాణాలు తీశారు'

మధ్యప్రదేశ్​ గ్వాలియర్​ ఎన్నికల ప్రచారంలో ప్రధాని నరేంద్ర మోదీ పాల్గొన్నారు. కాంగ్రెస్​ అధ్యక్షుడు రాహుల్​ గాంధీపై తీవ్ర విమర్శలు చేశారు. అమేఠీలో రాహుల్​ గాంధీ సన్నిహితుడికి చెందిన ఆసుపత్రిలో ఆయుష్మాన్​ భారత్​ కార్డు చెల్లడం లేదని ఆరోపించారు. దీని వల్ల ఓ పేదవాడు ప్రాణాలు కోల్పోయాడని ఆవేదన వ్యక్తం చేశారు మోదీ.

1977 ఎమర్జెన్సీ తర్వాత దేశంలో తొలిసారి ఓ ప్రభుత్వాన్ని తిరిగి ఎన్నుకోవడానికి ప్రజలు పోరాడుతున్నారని ప్రధానమంత్రి నరేంద్ర మోదీ వెల్లడించారు.

మధ్యప్రదేశ్​లోని గ్వాలియర్​లో ఎన్నికల ప్రచారం నిర్వహించిన మోదీ... తన కోసం మాతృమూర్తులు, చెల్లెళ్లు, యువత కలిసికట్టుగా ప్రచారం చేస్తున్నారని తెలిపారు.
విపక్షాలపై మోదీ మండిపడ్డారు.

ప్రజల సంక్షేమం కోసం కేంద్ర ప్రభుత్వం ప్రవేశపెట్టిన పథకాలను విపక్షాలు అడ్డుకుంటున్నాయని ఆరోపించారు.

"ఉత్తరప్రదేశ్​లోని అమేఠీలో ఓ ఆసుపత్రి ఉంది. ఈ అసుపత్రి ట్రస్ట్​కు చెందిన సభ్యుడు రాహుల్​ కుటుంబానికి సన్నిహితుడు. కొన్ని రోజుల క్రితం ఓ పేదవాడు ఆయుష్మాన్​ భారత్​ కార్డు పట్టుకుని చికిత్స పొందడానికి ఆ ఆసుపత్రికి వెళ్లాడు. ఆ తర్వాత ఏం జరిగిందో తెలిస్తే మీరు నివ్వెరపోతారు. మోదీ ఇచ్చిన ఆయుష్మాన్​ భారత్​ కార్డు ఉందనే ఆ పేదవాడికి వైద్యం చేయడానికి నిరాకరించారు. మీడియా కథనం ప్రకారం... ఆయుష్మాన్​ కార్డు చెల్లడానికి ఇది మోదీ ఆసుపత్రి కాదని వారు అన్నారు."
- నరేంద్ర మోదీ, ప్రధానమంత్రి.