భారతీయులను కరోనా వైరస్ కలవరపెడుతోంది. దీనితో పాటు 21 రోజుల లాక్డౌన్పై ప్రజల్లో తీవ్ర ఆందోళన నెలకొంది. అందరి ప్రశ్న నిత్యావసరాలపైనే. ముఖ్యంగా ఆహార ఏర్పాట్లపై అనేక సందేహాలున్నాయి. అయితే.. ప్రజలు తమ సందేహాలు విడిచిపెట్టాలని కేంద్రం చెబుతోంది. ఆహారం విషయంలో అన్ని ఏర్పాట్లు ముమ్మరంగా చేస్తున్నట్టు కేంద్ర ఆహారశాఖ మంత్రి రామ్ విలాస్ పాసవాన్ తెలిపారు. మార్కెట్లల్లో పరిస్థితులు ఎప్పటికప్పుడు పరిశీలిస్తున్నట్టు స్పష్టం చేశారు.
వైరస్ పేరుతో ఉత్పత్తిదారులు, ట్రేడర్లు.. ధరలను ఇష్టానుసారంగా పెంచితే కఠిన చర్యలు తప్పవని హెచ్చరించారు పాసవాన్. నిత్యావసర వస్తువుల కొరత ఉండకుండా.. ఎప్పటికప్పుడు రాష్ట్ర ప్రభుత్వాలతో చర్చిస్తున్నట్టు స్పష్టం చేశారు.
'వదంతుల వస్తే.. ఇక అంతే'
21రోజుల లాక్డౌన్ నేపథ్యంలో.. కరోనాపై వదంతుల వ్యాప్తిని అరికట్టేందుకు కేంద్ర హోంమంత్రిత్వశాఖ చర్యలు చేపట్టింది. ఈ మేరకు అన్ని రాష్ట్రాల ప్రధాన కార్యదర్శులు, డీజీపీలకు పలు సూచనలు జారీ చేసింది.
సూచనలేంటంటే..
- అన్ని రాష్ట్రాలు, కేంద్రపాలిత ప్రాంతాలు తమ రాష్ట్రంలో హెల్ప్‌లైన్‌ను ఏర్పాటు చేసుకోవాలి.
- ముఖ్యమైన, అవసరమైన వస్తువులకు సంబంధించి ఏదైనా సమస్య ఉంటే ఫిర్యాదు చేయాలని ప్రజలకు తెలపాలి.
- అవసరమైన వస్తువుల సరఫరా కొనసాగించడానికి వీలుగా జిల్లా పరిపాలన, పోలీసుల మధ్య సమన్వయం ఉంచేందుకు ఒక నోడల్ అధికారిని నియమించాలి.
- ఆహారం, మందులు, నిత్యావసరాలపై స్థానిక పాలనా యంత్రాంగం ద్వారా ప్రజలకు సమాచారం ఇవ్వాలి.
- ఎలాంటి వదంతులను నమ్మవద్దని ప్రజలకు చెప్పి.. వారిలో భరోసా నింపాలి.
- ఎక్కడా ఆహార, నిత్యావసరాల కోసం ప్రజలు ఇబ్బందులకు గురికాకుండా.. స్థానిక పాలనా యంత్రాంగం చర్యలు చేపట్టాలి.
ఇదీ చూడండి:- రోడ్డెక్కితే ముగ్గులో కూర్చోబెడతారు జాగ్రత్త!
