మహారాష్ట్రలో భాజపా ప్రభుత్వం ఏర్పాటు చేసిన తీరుపై తీవ్ర విమర్శలు చేశారు కేంద్ర మాజీ మంత్రి, కాంగ్రెస్ సీనియర్ నేత పి. చిదంబరం. దేవేంద్ర ఫడణవీస్, అజిత్ పవార్ ప్రమాణ స్వీకారం చేసిన వ్యవహారంలో గవర్నర్, ప్రధాని, రాష్ట్రపతి బాధ్యత వహించాలన్నారు.
ఐఎన్ఎక్స్ మీడియా కేసులో భాగంగా దిల్లీ కోర్టుకు హాజరైన సందర్భంగా ఈ వ్యాఖ్యలు చేశారు చిదంబరం.
"ఆ విధంగా వారు రాజ్యాంగ దినోత్సవాన్ని జరుపుకున్నారు. ఆ రకంగా వారు రాజ్యాంగానికి గౌరవం ఇచ్చారు. అర్ధరాత్రి వ్యవహారానికి గవర్నర్, ప్రధానమంత్రి, రాష్ట్రపతి బాధ్యత వహించాలి. ఈ ప్రక్రియలో రాష్ట్రపతి పాలుపంచుకోవటం విచారకరం. ఉదయం నాలుగింటికి రాష్ట్రపతిని నిద్రలేపినందుకు నేను చాలా బాధపడుతున్నాను."
- పి. చిదంబరం, కాంగ్రెస్ సీనియర్ నేత
డిసెంబర్ 11 వరకు కస్టడీ పొడగింపు..
ఐఎన్ఎక్స్ మీడియా మనీలాండరింగ్ కేసులో అరెస్టయిన చిదంబరం జుడీషియల్ కస్టడీని డిసెంబర్ 11 వరకు పొడిగించింది దిల్లీ కోర్టు.
మరో 14 రోజులు కస్టడీని పొడగించాలని ఎన్ఫోర్స్మెంట్ డైరెక్టరేట్ చేసిన అభ్యర్థన మేరకు ప్రత్యేక న్యాయమూర్తి అజయ్ కుమార్ కుహార్ ఆదేశాలు జారీ చేశారు. ఈడీ పిటిషన్ను చిదంబరం తరఫు న్యాయవాది వ్యతిరేకించకపోవటం గమనార్హం.
ఇదీ చూడండి: ఎస్పీజీని గత ప్రభుత్వాలు నీరుగార్చాయి: షా
