శివుడికి సమర్పించే పూలతో బయోగ్యాస్​

ఉత్తర్​ప్రదేశ్​లోని శివాలయంలో శివుడికి సమర్పించే పూలతో పర్యావరణహితమైన సేంద్రియ ఎరువులు తయారు చేస్తున్నారు ఆలయ అధికారులు. స్థానికుల్లో పర్యావరణ పరిరక్షణపై అవగాహన కల్పిస్తున్నారు. అయితే వీటిని ఎలా చేస్తున్నారంటే?

ఉత్తర్​ప్రదేశ్​ ఘజియాబాద్​ జిల్లాలోని ఇందిరాపురంలో షిప్రా సన్​ సిటీ శివాలయంలో రోజూ కుప్పలు తెప్పలగా పుష్పాలు వస్తాయి. అయితే అవన్నీ వృథాగా సమీపంలో చెరువులో కలిసిపోతాయి. కొన్ని రోజులకు కుళ్లి దుర్వాసన వస్తుంది. దీనికి పరిష్కారంగా పూలతో బయోగ్యాస్​ తయారు చేసి అందరికీ ఆదర్శంగా నిలుస్తున్నారు ఆలయ నిర్వాహకులు.

భక్తులు తెచ్చిన పూలు వృథా కాకుండా వినూత్న కార్యక్రమానికి శ్రీకారం చుట్టింది ఆలయ కమిటీ. దీని కోసం ఆలయ ఆవరణంలో బయోగ్యాస్​ ప్లాంట్​ను ఏర్పాటు చేసింది. పర్యావరణహితంగా శాస్త్రీయ పద్ధతిలో పూలతో జీవఇంధనం, సేంద్రీయ ఎరువులను తయారు చేసి అందరి ప్రశంసలు పొందుతున్నారు. ఆ బయోగ్యాస్​ను ఆయలంలో ప్రసాదం తయారీకి వంటచెరుకుగా వినియోగిస్తున్నారు.

"ప్రతిరోజు చాలా పూలు వస్తాయి. ఈ పుష్పాలను పర్యావరణహితంగా మర్చాలనుకున్నాం. దీంతో జీవ ఇంధనం తయారు చేయాలని నిర్ణయించుకున్నాం."

- వినయ్​ మిశ్రా, ఆలయ పూజారి

బయోగ్యాస్​ ఇలా తయారు..

'పుష్పాలను పడేసే ప్రదేశంలో బయోగ్యాస్​ ప్లాంట్​ను ఏర్పాటు చేశాం. దానిలో వృథా పూలను వేస్తే 24 గంటల వ్యవధిలో సేంద్రియ ఎరువుగా మారుతుంది. కుళ్లిన వ్యర్థాల నుంచి ఉత్పన్నమయ్యే వాయువును ప్లాంట్​ మీద ఏర్పాటు చేసిన గ్యాస్​ ట్యాంక్‌లోకి సేకరిస్తాం' అని బయోగ్యాస్ పనితీరును వివరించారు వినయ్​.

"శివుడికి సమర్పించే పాలు, పుష్పాలు నదుల్లో కలిసి కాలుష్యానికి కారణమవుతున్నాయి. దీనిపై ఆలయ కమిటీ సమావేశమై చర్చించింది. చివరిగా బయో గ్యాస్​ ప్లాంట్​ను ఏర్పాటు చేసింది. ఆ బయోగ్యాస్​ను ఆలయంలో ప్రసాదం వండటానికి ఉపయోగిస్తున్నాం"

- రవీంద్రనాథ్​ రాయ్​, ఆలయ ధర్మకర్త

ఇదీ చూడండి: మరో కీలక టన్నెల్​ నిర్మాణంపై కేంద్రం దృష్టి!