ఊరిలో ఎటువైపు చూసినా చెత్త ఉంటోంది. కుప్పలు కుప్పలుగా పేరుకుపోయిన వ్యర్థాలతో వచ్చే దుర్వాసన అంతా ఇంతా కాదు. చుట్టుపక్కల గ్రామాల చెత్తనూ ఇక్కడే పడేస్తారు. దీని వల్ల ఆ గ్రామం డంప్ యార్డుగా మారింది. చెత్తను కాల్చినప్పుడు వచ్చే పొగ వల్ల ఎన్నో ఆరోగ్య సమస్యలు వస్తున్నాయి. ఈ ప్రభావం గ్రామస్థుల ఆరోగ్యంపైనే కాదు... యువకుల జీవితం మీదా పడింది.
ఆ గ్రామంలోని యువకులు చాలా మంది ఉన్నత విద్యలు అభ్యసించారు. కానీ పెళ్లి సంబంధం కోసం వచ్చే యువతుల తల్లిదండ్రులు సుల్తాపూర్ పరిస్థితిని చూసి భయపడిపోతున్నారు. ఇలాంటి పరిసరాలున్న ఇంటికి తమ కూతురిని పంపలేమని వెనుదిరుగుతున్నారు. వివాహం చేసుకోవాలంటే గ్రామం విడిచి వెళ్లాల్సిందేనని తేల్చి చెబుతున్నారు.
సుల్తాపూర్లో రోడ్లకు ఇరువైపులా చెత్త దర్శనమిస్తుంది. ఈగలు ఎక్కువగా ఉంటాయి.
"ముఖ్యమంత్రి గతంలో ఇక్కడికి వచ్చారు. దుర్వాసన భరించలేక ముక్కుమూసుకుని తిరిగి వెళ్లిపోయారు. అలాంటిది మేము ఎలా నివసించాలిక్కడ? పరిస్థితిపై ఎన్నిసార్లు ఫిర్యాదు చేసినా పట్టించుకునే వారు లేరు."
- సుల్తాపూర్ గ్రామస్థులు
పురపాలక సంఘం అధికారులకు ఎన్ని ఫిర్యాదులు చేసినా పట్టించుకోలేదు. 15ఏళ్లుగా వ్యర్థాల మధ్యే జీవనం సాగిస్తున్నారు సుల్తాపూర్వాసులు.
