ముస్లిం మహిళల రక్షణ కోసం కేంద్రం నూతనంగా రూపొందించిన ముమ్మారు తలాక్ బిల్లును లోక్సభలో ప్రవేశపెట్టారు కేంద్రమంత్రి రవిశంకర్ ప్రసాద్. ప్రధాని నరేంద్ర మోదీ ప్రభుత్వం రెండోసారి అధికారంలోకి వచ్చాక సభ ముందుకు తీసుకువచ్చిన మొదటి బిల్లు ఇది.
ముమ్మారు తలాక్ బిల్లును ప్రవేశ పెట్టేందుకు 186 మంది సభ్యులు అంగీకారం తెలిపారు. 74 మంది వ్యతిరేకించారు.
ఇది మతానికి సంబంధించిన విషయం కాదని మహిళల న్యాయం కోసం తీసుకువచ్చిన బిల్లని రవిశంకర్ ప్రసాద్ చెప్పారు. గతంలో మద్దతిస్తామని తెలిపిన కాంగ్రెస్ ఇప్పడు వ్యతిరేకించడాన్ని తప్పుబట్టారు.
వ్యతిరేకించిన కాంగ్రెస్
ముమ్మారు తలక్ బిల్లు రాజ్యాంగ విరుద్ధమని కాంగ్రెస్ నేత శశిథరూర్ వివరణ ఇచ్చారు. కేవలం ఓకే వర్గాన్ని లక్ష్యం చేసుకుని రూపొందిన బిల్లును తాము అంగీకరించబోమని తేల్చిచెప్పారు.
ఇదేం న్యాయం: ఒవైసి
ముమ్మూరు తలాక్ బిల్లు మహిళల రక్షణ కోసం రూపొందించామని చెబుతున్న కేంద్రం... శబరిమల ఆలయంలోకి మహిళల ప్రవేశాన్ని ఎందుకు వ్యతిరేకించిందని ప్రశ్నించారు ఎంఐఎం నేత అసదుద్దీన్ ఒవైసి.
ఇతర వర్గాల వారికి ఒకే ఏడాది జైలు శిక్ష ఉండగా... ముస్లింలకు మూడేళ్లపాటు శిక్ష విధించడం రాజ్యాంగ విరుద్ధమన్నారు ఒవైసి.
ముమ్మారు తలక్ బిల్లును ఆర్ఎస్పీ ఎంపీ ఎన్.కే ప్రేమ చంద్రన్ వ్యతిరేకించారు.
హోమియోపతి కేంద్ర మండలి బిల్లు...
నేడు లోక్సభలో హోమియోపతి కేంద్ర మండలి సవరణ బిల్లునూ ప్రవేశపెట్టారు. బోర్డు కాలపరిమితిని ఏడాది నుంచి రెండేళ్లకు పెంచడం ఈ బిల్లు లక్ష్యం. ఈ ప్రకారం మండలి సభ్యులు 2019, మే 17 నుంచి మరో ఏడాది పాటు పదవిలో కొనసాగుతారు.
- ఇదీ చూడండి: సంతాప సభలో ఎమ్మెల్యే నృత్యాంజలి!
