మహిళలకు 'కేజ్రీ'​ గిఫ్ట్​.. ఉచిత బస్సు సేవలు ప్రారంభం

దిల్లీలో మహిళలకు ఉచిత బస్సు ప్రయాణ పథకం ప్రారంభమైంది. ఈ పథకం ద్వారా మహిళలకు భద్రత చేకూరుతుందని దిల్లీ ఉపముఖ్యమంత్రి మనీశ్ సిసోడియా అభిప్రాయపడ్డారు. స్వాతంత్య్ర దినోత్సవం నాడు ముఖ్యమంత్రి కేజ్రీవాల్ ఇచ్చిన హామీ మేరకు ఈ పథకాన్ని ప్రారంభించారు.

ప్రభుత్వ బస్సుల్లో మహిళలకు ఉచిత ప్రయాణ పథకం దిల్లీలో ఈ రోజు ఉదయం ప్రారంభమైంది. ఇది మహిళల భద్రతకు ఎంతో ఉపకరిస్తుందని దిల్లీ ఉపముఖ్యమంత్రి మనీశ్ సిసోడియా పేర్కొన్నారు.

ఈ ఉచిత ప్రయాణ పథకాన్ని పొందడానికి దిల్లీ ట్రాన్స్​పోర్ట్ కార్పొరేషన్​ (డీటీసీ).. క్లస్టర్​ బస్సుల్లో పయనించే మహిళలకు పింక్ టికెట్లు ఇవ్వనుంది. ఈ టికెట్ల ధరను డీటీసీకి ప్రభుత్వం చెల్లిస్తుంది.

"దిల్లీ బస్సుల్లో మహిళలకు ఉచిత ప్రయాణ పథకం ఇవాళ ప్రారంభమైంది. దిల్లీకి శుభాకాంక్షలు. ఇది మహిళల భద్రతకు తోడ్పడుతుంది. దిల్లీ ఆర్థిక వ్యవస్థలో మహిళ పాత్రను మరింత ఇనుమడింపజేస్తుంది."
- మనీశ్​ సిసోడియా ట్వీట్, దిల్లీ ఉపముఖ్యమంత్రి ​

సోమవారం రాత్రి కేజ్రీవాల్ ప్రభుత్వం మహిళలకు ఉచిత బస్సు ప్రయాణ పథకాన్ని అమలు చేస్తూ నోటిఫికేషన్ జారీ చేసింది. నోయిడా-ఎన్​సీఆర్​, విమానాశ్రయం, డీటీసీ, క్లస్టర్ స్కీమ్ ఆపరేటర్లు నిర్వహించే ఇతర ప్రత్యేక సేవల్లోనూ ఈ ఉచిత ప్రయాణ సౌకర్యం ఉంటుంది. ఈ పథకం పట్ల అక్కడి మహిళలు సంతోషం వ్యక్తం చేస్తున్నారు.

కేజ్రీవాల్ 'భాయ్​ దూజ్​'

స్వాతంత్య్ర దినోత్సవ ప్రసంగంలో ముఖ్యమంత్రి కేజ్రీవాల్​.. అక్టోబర్​ 29 నుంచి భాయ్​ దూజ్ సందర్భంగా మహిళలకు ఉచిత బస్సు ప్రయాణ సౌకర్యం కల్పిస్తామని హామీ ఇచ్చారు. దీనికి దిల్లీ కేబినెట్ ఆగస్టు 29న సూత్రప్రాయంగా ఆమోదించింది. అయితే ఈ సదుపాయాన్ని పొందడానికి ప్రభుత్వ మహిళా ఉద్యోగులు తమ రవాణా భత్యాన్ని వదులుకోవాల్సిన అవసరం ఉందని స్పష్టం చేసింది.

దిల్లీ ప్రభుత్వ బస్సుల్లో ప్రతి రోజూ 45 లక్షలమంది ప్రయాణిస్తుంటారని అధికారిక గణాంకాలు చెబుతున్నాయి.

ఇదీ చూడండి: ప్రీ పెయిడ్​.. పోస్ట్​ పెయిడ్​.. ఏ ప్లాన్​ ఉత్తమం..!