నూతన వ్యవసాయ చట్టాల రద్దు కోసం దిల్లీ సరిహద్దుల్లో ఉద్యమిస్తున్న రైతులు.. గురువారం ట్రాక్టర్ ర్యాలీ చేపట్టారు. సింఘు, టిక్రీ, గాజీపుర్ దీక్షాస్థలి నుంచి వాహనాల ప్రదర్శన నిర్వహించారు. పటిష్ఠ బందోబస్తు మధ్య వేలాది మంది అన్నదాతలు ఈ ర్యాలీలో పాల్గొన్నారు. జనవరి 26న దిల్లీలోని రాజ్పథ్లో నిర్వహించే కవాతుకు ముందస్తు కసరత్తుగా దీన్ని భావిస్తున్నారు.
గురువారం ఉదయం 11 గంటలకు దీక్షాస్థలి నుంచి కుండ్లి-మనేస్వర్-పల్వాల్ వైపు ఈ కార్యక్రమాన్ని చేపట్టారు. ఈ మార్గాల్లో దిల్లీ, హరియాణాకు చెందిన పోలీసులు బలగాలు భారీ సంఖ్యలో మోహరించాయి. 3,500కు పైగా ట్రాక్టర్లు, ట్రాలీలతో రైతులు ఈ ర్యాలీలో పాల్గొన్నట్లు భారతీ కిసాన్ ఏక్తా యూనియన్(బీకేయూ) అధ్యక్షుడు జోగీందర్ సింగ్ తెలిపారు.
బీకేయూ నేత రాకేష్ తికైత్ నేతృత్వంలో మొదలైన ఈ యాత్ర పల్వాల్ వైపు కొనసాగింది. ప్రభుత్వం తమ డిమాండ్లను అంగీకరించకపోతే.. రానున్న రోజుల్లో ఉద్యమాన్ని మరింత ఉద్ధృతం చేస్తామని సంయుక్త్ కిసాన్ మోర్చా సీనియర్ సభ్యుడు అభిమన్యు కోహర్ తెలిపారు. హరియాణా నుంచి దాదాపు 2,500 ట్రాక్టర్లు ఈ ర్యాలీలో పాల్గొన్నాయని చెప్పారు.
సింఘు, టిక్రీ సరిహద్దులోని నాలుగు ప్రాంతాల్లో ఈ ట్రాక్టర్ ర్యాలీ ప్రారంభమైంది. సింఘు - టిక్రీ, టిక్రీ - కుండ్లీ, గాజీపుర్ - పల్వాల్, రేవసాన్- పల్వాల్ వరకు ఈ యాత్ర మొదలుపెట్టారు. దిల్లీ సరిహద్దులో తీవ్రమైన చలి, వర్షం వణికిస్తున్న అన్నదాతలు పట్టువిడవకుండా తమ ఉద్యమాన్ని కొనసాగిస్తున్నారు.
ఇదీ చదవండి:లైవ్: 'ట్రాక్టర్' ఎక్కిన రైతన్న- సాగు చట్టాలపై పోరు
