భారత్ బంద్కు కాంగ్రెస్ మద్దతు
సాగు చట్టాలపై కేంద్రంతో జరిపిన చర్చలు కొలిక్కి రాకపోవటం వల్ల ఈనెల 8న భారత్ బంద్కు పిలుపునిచ్చాయి రైతు సంఘాలు. ఈ నేపథ్యంలో బంద్కు విపక్ష, భాజపా భాగస్వామ్యేతర ప్రాంతీయ పార్టీల నుంచి మద్దతు లభిస్తోంది. తాజాగా కాంగ్రెస్ కూడా భారత్ బంద్కు మద్దతు ప్రకటించింది.
" డిసెంబర్ 8న జరగబోయే భారత్ బంద్కు మద్దతు ఇవ్వాలని కాంగ్రెస్ నిర్ణయించింది. దేశవ్యాప్తంగా ఉన్న మా పార్టీ కార్యాలయాల్లో ఆందోళనలు చేపడతాం. ఇది రైతుల పట్ల రాహుల్ గాంధీ మద్దతును మరింత బలోపేతం చేస్తుంది. దేశవ్యాప్త బంద్ విజయవంతమవుతుందని భరోసా ఇస్తున్నాం."
- పవన్ ఖేరా, కాంగ్రెస్ అధికార ప్రతినిధి
రైతులు చేస్తోన్న ఆందోళనలకు మొదటి నుంచే మద్దతుగా నిలుస్తున్నారు కాంగ్రెస్ అగ్రనేత రాహుల్ గాంధీ, ట్విట్టర్తో పాటు బహిరంగంగానూ కేంద్రంపై విమర్శలు చేశారు. రైతుల సమస్యలను పరిష్కరించాలని డిమాండ్ చేశారు. ఇప్పటికే.. బంగాల్ ముఖ్యమంత్రి మమతా బెనర్జీ కూడా రైతుల సమస్యలు పరిష్కరించకుంటే దేశవ్యాప్తంగా ఆందోళనలు చేపడతామని కేంద్రానికి హెచ్చరికలు పంపారు.
