మహారాష్ట్రలో కరోనా విజృంభిస్తోంది. ఈ సంక్షోభ సమయంలో రాష్ట్ర ప్రజలకు భరోసా కల్పించేందుకు ముఖ్యమంత్రి ఉద్ధవ్ఠాక్రే కీలక వ్యాఖ్యలు చేశారు. ప్రజలకు హిందూ సంవత్సరాది 'గుడి పద్వా' శుభాకాంక్షలు తెలిపిన ఉద్ధవ్.. ఈ కష్ట సమయంలో ప్రతి పురుషుడు తమ 'హోంమంత్రి'(భార్య) చెప్పిన విధంగా నడుచుకోవాలని, తాను కూడా అదే చేస్తున్నట్లు పేర్కొన్నారు.
వీలైనంతవరకు ఏసీలను తగ్గించి, సహజ సిద్ధమైన గాలికే ప్రాధాన్యం ఇవ్వాలని కోరారు. నిత్యావసరాల నిల్వలు తగినంత ఉన్నాయని, ఎవరూ అందోళన చెందాల్సిన అవసరం లేదని భరోసా ఇచ్చారు. మాస్కులు తయారు చేయడానికి కార్పొరేట్ సంస్థలు ముందుకు వస్తున్నాయన్నారు ఠాక్రే.
ప్రైవేటు సంస్థలు తమ కార్మికుల జీతాలను తగ్గించవద్దని కోరారు ఉద్ధవ్. ప్రజలు మార్కెట్లకు వెళ్లినప్పుడు సామాజిక దూరం పాటించాలని సూచించారు. కరోనాపై తప్పకుండా విజయం సాధిస్తామని ఆశాభావం వ్యక్తం చేశారు.
" ఈ సంక్షోభ సమయంలో సానుకూల అంశం ఒకటి ఉంది. కుటుంబ సభ్యులందరూ ఒకేచోట చేరి ఆనందంగా గడపవచ్చు. మనం కోల్పోయింది.. మళ్లీ పొందుదాము."
- ఉద్ధవ్ ఠాక్రే, మహారాష్ట్ర ముఖ్యమంత్రి
