లోక్సభ ఎన్నికలు చివరి అంకానికి చేరుకున్నాయి. సాధారణ ఎన్నికల్లో ఇప్పటికే 6 దశలు పూర్తయ్యాయి. చివరిదైన ఏడో విడత ఓటింగ్ ప్రారంభమైంది. ఓటు హక్కు వినియోగించుకోవడానికి ఓటర్లు వరుసక్రమంలో బారులుదీరారు. ఎన్నికల ప్రక్రియ సజావుగా జరిగేలా ఎన్నికల సంఘం అన్ని జాగ్రత్తలు తీసుకుంది.
ఏడో విడతలో 7 రాష్ట్రాలు, ఒక కేంద్రపాలిత ప్రాంతంలోని 59 స్థానాలకు ఓటింగ్ జరుగుతోంది. 918 మంది అభ్యర్థుల భవితవ్యాన్ని 10.01 కోట్ల మంది ఓటర్లు నిర్ణయించనున్నారు. అన్ని నియోజకవర్గాల్లో కలిపి లక్షా 12 వేల పోలింగ్ కేంద్రాలను ఏర్పాటు చేసింది ఎన్నికల సంఘం.
ఈసీ భద్రత నడుమ
పోలింగ్ సమయంలో ఎలాంటి అవాంఛనీయ ఘటనలు జరగకుండా ఎన్నికల సంఘం కట్టుదిట్టమైన భద్రతా ఏర్పాట్లు చేసింది. గత విడతల్లో అల్లర్లు చోటుచేసుకున్న బంగాల్లో భారీగా కేంద్ర బలగాలను మోహరించింది. సమస్యాత్మక ప్రాంతాలపై ప్రత్యేక దృష్టి సారించింది ఈసీ.
ఇవే కీలకం...
చివరి దశ నిర్ణయాత్మకమైందని రాజకీయ విశ్లేషకులు అభిప్రాయపడుతున్నారు. ఏడో దశలోని స్థానాలు భాజపాకు కీలకం కానున్నాయి. 2014 లోక్సభ ఎన్నికల్లో ఎక్కువ మంది భాజపా అభ్యర్థులు ఈ దశలోని స్థానాల్లోనే గెలిచారు. వీటిని నిలుపుకుంటేనే భాజపా తిరిగి అధికారం సాధించగలుగుతుందని నిపుణుల విశ్లేషణ.
ప్రముఖ స్థానాలు
ఈ చివరి దశ ఎన్నికల్లో ప్రముఖులు పోటీ పడుతున్నారు. ప్రధాని నరేంద్రమోదీ బరిలో ఉన్న ఉత్తర్ప్రదేశ్ వారణాసి ఎన్నిక ఈ విడతలోనే జరుగుతోంది. పాటలీపుత్రలో ఆర్జేడీ అధినేత లాలూ తనయ మిశా భారతి, పట్నా సాహిబ్ నుంచి కేంద్ర మంత్రి రవిశంకర్ ప్రసాద్, కాంగ్రెస్ నేత శతృఘ్న సిన్హా అమీతుమీ తేల్చుకోనున్నారు. పంజాబ్ గురుదాస్పుర్లో సన్నీదేఓల్పై ఆశలు పెట్టుకుంది కాషాయ పార్టీ.
ఇదీ చూడండి: నేడు బదరీనాథ్కు ప్రధాని నరేంద్ర మోదీ
