కర్ణాటక అసెంబ్లీ ఉప ఎన్నికలు వాయిదాపడ్డాయి. అనర్హత వేటు పడిన ఎమ్మెల్యేల పిటిషన్పై ఆదేశాలు ఇచ్చే వరకు వాయిదా వేస్తామని సుప్రీం కోర్టుకు తెలిపింది ఈసీ.
కర్ణాటకలో 15 అసెంబ్లీ స్థానాల ఉప ఎన్నికలకు ఇటీవలే షెడ్యూల్ విడుదల చేసింది ఈసీ. అక్టోబర్ 21 ఓటింగ్ జరిగి, 24న ఫలితాలు విడుదల కావాల్సి ఉంది.
ఎన్నికల్లో పోటీ చేసేందుకు అవకాశం కల్పించాల్సిందిగా అనర్హతకు గురైన 17 మంది ఎమ్మెల్యేలు సుప్రీం కోర్టును ఆశ్రయించారు. ఈ పిటిషన్లపై జస్టిస్ ఎన్వీ రమణ నేతృత్వంలోని త్రిసభ్య ధర్మాసనం విచారణ చేపట్టింది. పూర్తి స్థాయిలో విచారణ జరిగిన తర్వాతే తీర్పు వెలువరిస్తామని తెలిపింది. ఈ సందర్భంగా అసెంబ్లీ ఉప ఎన్నికలు వాయిదా వేస్తామని ఈసీ తరఫు న్యాయవాది రాకేశ్ ద్వివేదీ ధర్మాసనానికి తెలిపారు.
తీర్పు వెలువడే వరకు ఉప ఎన్నికలు వాయిదా వేస్తే తమకు ఎలాంటి అభ్యంతరం లేదని పేర్కొన్నారు ఎమ్మెల్యేల తరఫు న్యాయవాది.
ఇరు పక్షాల వాదనల అనంతరం తదుపరి విచారణను అక్టోబర్ 22కు వాయిదా వేసింది ధర్మాసనం.
ఇదీ చూడండి: ఎన్ఆర్సీ దుమారం: కేజ్రీకి వ్యతిరేకంగా భాజపా ఆందోళన
