కాంగ్రెస్ సీనియర్ నేత డీకే శివకుమార్ కుమార్తె ఐశ్వర్యపై ఎన్ఫోర్స్మెంట్ డైరెక్టరేట్ 7 గంటల పాటు ప్రశ్నల వర్షం కురిపించింది. మనీలాండరింగ్ కేసులో ఆరోపణలు ఎదుర్కొంటున్న డీకే కేసు విచారణ నిమిత్తం.. దిల్లీ ఈడీ కార్యాలయం ఎదుట హాజరయ్యారు ఆయన కుమార్తె.
మనీలాండరింగ్ నిరోధక చట్టం(పీఎంఎల్ఏ) కింద ఆమె వాంగ్మూలాన్ని నమోదు చేశారు అధికారులు. 2017లో తన కుమార్తెతో కలిసి సింగపూర్ పర్యటనకు వెళ్లినట్లుగా శివకుమార్ చేసిన వ్యాఖ్యలపై ఆమెను ప్రశ్నించారు. పర్యటనకు సంబంధించిన పత్రాలు, వివరాలను అధికారులకు సమర్పించారు ఐశ్వర్య.
తండ్రి నిర్వహిస్తున్న ఓ ఎడ్యుకేషన్‌ ట్రస్ట్‌కు 22ఏళ్ల ఐశ్వర్య ట్రస్టీగా ఉన్నారు. శివకుమార్ ఆర్థిక లావాదేవీలను పరిశీలిస్తున్న క్రమంలో ఈ ట్రస్ట్‌కు సంబంధించిన పత్రాలు ఈడీ దృష్టికి వచ్చాయి. అయితే, తండ్రీ కుమార్తె మధ్య జరిగిన ఆర్థిక లావాదేవీలకు మనీలాండరింగ్ సొమ్ముతో ఏమైనా సంబంధం ఉందా? అనే కోణంలోనూ విచారించినట్టు తెలుస్తోంది.
మళ్లీ దిల్లీ కోర్టుకు...
మనీలాండరింగ్ కేసులో ఆరోపణలతో డీకేను సెప్టెంబర్ 3న అరెస్టు చేసింది ఈడీ. ఆయనకు విధించిన 9 రోజుల కస్టడీ శుక్రవారంతో ముగియనున్న నేపథ్యంలో డీకేను దిల్లీ కోర్టు ముందు ప్రవేశపెట్టే అవకాశముంది.
