జాతీయ ఓటర్ల దినోత్సవాన్ని పురస్కరించుకుని కేంద్ర ఎన్నికల సంఘం ఎలక్ట్రానిక్ ఓటరు గుర్తింపు కార్డులను పరిచయం చేసింది. ఈ డిజిటల్ కార్డును పీడీఎఫ్‌ ఫార్మాట్‌లో ప్రింట్‌ చేసుకోవచ్చు. అంతేగాక డిజీ లాకర్‌లోనూ సేవ్ చేసుకోవచ్చు.
ఓటరు ఐడీ కార్డును సత్వరమే ప్రజలకు అందించే ఉద్దేశంతోనే ఈ గుర్తింపు కార్డును రూపొందించినట్టు ఈసీ వెల్లడించింది. అవగాహన ఉన్నవారు మీ-సేవ కేంద్రాలకు వెళ్లకుండానే ఓటరు కార్డు తీసుకోవచ్చని తెలిపింది. ఈ మేరకు దిల్లీలో జరిగిన ఒక కార్యక్రమంలో కేంద్ర న్యాయ శాఖ మంత్రి రవిశంకర్‌ ప్రసాద్‌ ఎలక్ట్రానిక్ ఓటరు కార్డులను ఆవిష్కరించారు. కొత్తగా ఓటు హక్కు నమోదు చేసుకున్న ఐదుగురికి డిజిటల్ కార్డులను మంత్రి అందజేశారు.
ఇక మరోవైపు రాష్ట్రపతి రామ్నాథ్ కోవింద్ ఆన్లైన్ డిజిటల్ రేడియోలో ఓటరు అవగాహనా కార్యక్రమం 'హలో ఓటర్స్'ను ప్రారంభించారు.
ఈ ఎన్నికల నుంచే..
త్వరలో ఎన్నికలు జరగనున్న బంగాల్, తమిళనాడు, అసోం, కేరళ, పుదుచ్చేరి ఎన్నికల్లో ఈ-ఓటరు కార్డును ఉపయోగించుకోవచ్చని ప్రకటించింది ఈసీ. అయితే ఇప్పుడున్న కార్డులు కొనసాగుతాయని స్పష్టం చేసింది. ఆన్లైన్లో ఎలాంటి మార్పులు చేయడానికి వీల్లేకుండా వీటిని రూపొందించినట్లు తెలిపింది.
ఇప్పటికే ఆధార్‌, పాన్‌, డ్రైవింగ్‌ లైసెన్స్‌ వంటివి డిజిటల్ మోడ్లో అందుబాటులో ఉండగా.. ఆ జాబితాలో ఓటరు గుర్తింపు కూడా చేరింది. 1993 నుంచి.. ఫొటోతో కూడిన ఓటరు కార్డునే గుర్తింపు కార్డుగా పరిగణిస్తోంది ఈసీ.
ఇదీ చదవండి : 'లైంగిక వేధింపులపై హైకోర్టు తీర్పు దారుణం'
