బిహార్‌లోని ముంగేర్ జిల్లాలో జరిగిన హింసాత్మక ఘటనలకు బాధ్యులుగా జిల్లా ఎస్పీ లిపి సింగ్, మేజిస్ట్రేట్ను తొలగించాలని ఎన్నికల కమిషన్ ఆదేశాలు జారీ చేసింది. మొత్తం ఘటనపై మగద్ డివిజనల్ కమిషనర్ నేతృత్వంలో దర్యాప్తునకు ఆదేశించింది. వారంలోపు నివేదికను సమర్పించాలని తెలిపింది.
అయితే గురువారం కూడా ముంగేర్లో ఉద్రిక్త పరిస్థితులు నెలకొన్నాయి. ఆందోళనకారులు ఎస్పీ ఆఫీస్ సహా పోలీస్ ఔట్పోస్ట్ను ధ్వంసం చేశారు. ఎస్డీఓ కార్యాలయమే లక్ష్యంగా నిరసనకారులు దాడి చేసినట్లు అధికారులు వెల్లడించారు.
ముంగేర్ రాజీవ్ చౌక్లో ఆందోళనకారులు టైర్లకు నిప్పంటించారు. ఈ నెల 26న భక్తులపై కాల్పులకు ఆదేశించిన జిల్లా ఎస్పీ, సంబంధిత అధికారులపై వెంటనే చర్యలు తీసుకోవాలని డిమాండ్ చేశారు.
ఉద్రిక్త వాతావరణం నెలకొన్న నేపథ్యంలో పోలీసులు ఆ ప్రాంతంలో కవాతు నిర్వహించారు.
రాజకీయం...
పోలీసుల వ్యవహరించిన తీరుపై ప్రతిపక్ష ఆర్జేడీ, కాంగ్రెస్.. ప్రభుత్వాన్ని తప్పుబట్టాయి. భక్తులపై పోలీసులు కాల్పులు జరపడాన్ని జలియన్వాలా బాగ్ ఘటనతో పోల్చింది ఆర్జేడీ.
నితీశ్ కుమార్, సుశీల్ కుమార్ మోదీ ప్రభుత్వం సూచనల మేరకే భక్తులపై లాఠీఛార్జీ, కాల్పులు చేసినట్లు కాంగ్రెస్ ఆరోపించింది. మొత్తం ఘటనకు సీఎం నితీశ్ బాధ్యత వహించాలని డిమాండ్ చేశారు కాంగ్రెస్ నేత రణ్దీప్ సుర్జేవాలా.
ఏం జరిగింది...?
ఈ నెల 26న దుర్గామాత నిమజ్జనోత్సవాల సందర్భంగా పోలీసులు, భక్తుల మధ్య ఘర్షణ జరిగింది. పోలీసులు లాఠీఛార్జీ చేసి, పరిస్థితులు సద్దుమణగకపోవడం వల్ల కాల్పులు జరిపారు. ఈ కాల్పుల్లో ఓ యువకుడు మరణించాడు. ఈ ఘటనపై ప్రజల్లో తీవ్ర ఆగ్రహావేశాలు వ్యక్తమవుతున్నాయి.
అయితే వేటుకు గురైన ఎస్పీ లిపి సింగ్ తండ్రి రామచంద్ర ప్రసాద్ సింగ్ జేడీయూ నేత. ఆయన రాజ్యసభ సభ్యుడిగా ఉన్నారు. ఆమె 2016 బ్యాచ్ ఐపీఎస్ అధికారిణి.
