తూర్పు లద్దాఖ్లో చైనాతో ఉద్రిక్త పరిస్థితులను తగ్గించేందుకు చర్చలు కొనసాగుతూనే ఉన్నాయి. ఈ నేపథ్యంలో ఇరు దేశాల మధ్య 7వ విడత కార్ప్స్ కమాండర్ స్థాయి చర్చలు సోమవారం జరగనున్నాయి. ఈ భేటీలో సరిహద్దుల్లో బలగాలను పూర్తిస్థాయిలో, సత్వరం ఉపసంహరించటంపై భారత్ ఒత్తిడి పెంచనుందని అధికార వర్గాలు తెలిపాయి. అందుకు తగిన వ్యూహాలతో సిద్ధమైనట్లు వెల్లడించాయి.
మధ్యాహ్నం 12 గంటలకు..
భారత్ వైపు తూర్పు లద్దాఖ్లోని వాస్తవాధీన రేఖ వెంబడి (ఎల్ఏసీ) చుషుల్ ప్రాంతంలో మధ్యాహ్నం 12 గంటలకు ఈ చర్చలు ప్రారంభం కానున్నాయి. భారత బృందానికి లేహ్లోని 14 కార్ఫ్స్ కమాండర్ లెప్టినెంట్ జనరల్ హరిందర్ సింగ్ నేతృత్వం వహించనున్నారు. ఈ బృందంలో లెప్టినెంట్ జనరల్ పీజీకే మెనన్, విదేశాంగ శాఖ సంయుక్త కార్యదర్శి(తూర్పుఆసియా) నవీన్ శ్రీవాస్తవ సహా పలువురు అధికారులు ఉన్నారు. తూర్పు లద్దాఖ్లోని అన్ని ఘర్షణ ప్రాంతాల నుంచి బలగాలను ఉపసంహరించుకోవటానికి రోడ్మ్యాప్ ఖరారు చేయటమే ఈ భేటీ ప్రధాన అజెండ అని అధికారవర్గాలు తెలిపాయి.
" అన్ని ఘర్షణ ప్రాంతాల నుంచి బలగాలను పూర్తిస్థాయిలో, సత్వరం ఉపసంహరించుకోవాలని భారత్ మరోమారు ఒత్తిడి పెంచనుంది. ఈ ప్రక్రియను ప్రారంభించడానికి చైనా సైన్యంపై బాధ్యత ఉంది. ఈ చర్చల్లో భాగంగా సరిహద్దుల్లో స్థిరత్వాన్ని కొనసాగించటం, ఉద్రిక్తతలు పెంచే చర్యలకు పాల్పడకుండ ఉండేందుకు మరిన్ని చర్యలు చేపట్టటంపై ఇరువైపులా పరిశీలించే అవకాశం ఉంది."
- అధికారవర్గాలు
సీఎస్జీ భేటీ..
7వ విడత కమాండర్ స్థాయి చర్చల కోసం ఇప్పటికే రక్షణ మంత్రి రాజ్నాథ్ సింగ్, విదేశాంగ మంత్రి జైశంకర్, జాతీయ భద్రత సలహాదారు అజిత్ ధోబాల్, త్రిదళాధిపతి జనరల్ బిపిన్ రావత్, త్రివిద దళాల అధినేతలతో కూడిన చైనా అధ్యయన బృందం(సీఎస్జీ) గత శుక్రవారం సమావేశమైంది. సైనిక చర్చల్లో భారత్ అనుసరించాల్సిన వ్యూహాలను ఖరారు చేసింది.
చైనా డిమాండ్ను వ్యతిరేకించటం..
పాంగోంగ్ సరస్సు వంటి కీలక ప్రాంతాల నుంచి బలగాల ఉపసంహరణను భారత్ మొదట ప్రారంభించాలని చైనా డిమాండ్ చేస్తే.. దానిని భారత్ తీవ్రంగా వ్యతిరేకించాలని నిర్ణయించినట్లు అధికావర్గాలు తెలిపాయి. గత కమాండర్ స్థాయి చర్చల సందర్భంగా పాంగోంగ్ సరస్సు దక్షిణ ప్రాంతంలోని ముఖ్పారి, రెజాంగ్ లా, మాగర్ హిల్ ప్రాంతాలలోని అనేక వ్యూహాత్మక ప్రాంతాల నుంచి భారత దళాలను ఉపసంహరించుకోవాలని చైనా పట్టుబట్టింది.
ఆరో విడత సైనిక స్థాయి చర్చలు సెప్టెంబర్ 21న జరిగాయి. సరిహద్దులకు అదనపు బలగాలను తరలించకపోవటం, ఏకపక్షంగా యథాతథ స్థితిని మార్చే ప్రయత్నాలకు దూరంగా ఉండటం, ఉద్రిక్తతలు పెంచే విధంగా ఎలాంటి చర్యలకు పూనుకోకపోవటం వంటి అంశాలపై ఇరుదేశాల అధికారులు కీలక నిర్ణయాలను ప్రకటించారు.
ఇదీ చూడండి: చైనాతో చర్చలకు ముందు అత్యున్నత స్థాయి సమావేశం
