ఒక్క ఓటూ వృథా కాకూడదు : 111 ఏళ్ల ఓటరు

111 ఏళ్ల వయసులోనూ ఓటేసేందుకు తాను సిద్ధమంటున్నారు దిల్లీకి చెందిన బచ్చన్​ సింగ్​. ఓటు హక్కు వృథా కాకుండా... అందరూ ఓటు వేయాలని పిలుపునిస్తున్నారు. ఓటింగ్​కు రావాలని ఇంటికొచ్చి మరీ ఆయనను ప్రత్యేకంగా ఆహ్వానించారు ఎన్నికల సంఘం అధికారులు. బచ్చన్​ కుటుంబ సభ్యులు ఆనందం వ్యక్తం చేశారు.

ఎన్నికల్లో ఒక్క ఓటు కూడా వృథా కాకూడదని ఆకాంక్షించారు దిల్లీ ఎన్నికల్లో ఓటు వేయనున్న అత్యధిక వయస్కులైన ఓటరు బచ్చన్​ సింగ్​. ఆయనకు 111ఏళ్లు. నేడు జరిగే పోలింగ్​లో ఆయన ఓటు హక్కు వినియోగించుకోనున్నారు.

ఎన్నికల సంఘం అధికారులు ఇంటికొచ్చి మరీ బచ్చన్​ను ఓటు వేయాలంటూ ఆహ్వానించారు. ఆయనను ఇంటి నుంచి పోలింగ్​ కేంద్రానికి, అక్కడి నుంచి ఇంటికి తీసుకొచ్చేందుకు ప్రత్యేక ఏర్పాట్లు చేశారు.

ఎన్నికల సంఘం అధికారులు ఇంటికి రావడం పట్ల హర్షం వ్యక్తం చేశారు బచ్చన్​ సింగ్​ కోడలు.

" ఆయన చాలా సంతోషపడ్డారు. ఆయనతో అధికారులు మాట్లాడారు. చాలా ప్రశ్నలు అడిగారు. కొన్నింటికి ఆయన సమాధానం చెప్పారు. ఓ ధ్రువపత్రం, పుష్పగుచ్ఛం, ఓ మగ్గు ఇచ్చారు" -- బచ్చన్​ సింగ్​ కోడలు

మూడేళ్ల క్రితం వరకు సైకిల్​ నడిపారు

గతంలో సైకిల్​పై భార్యను తీసుకెళ్లి బచ్చన్​ ఓటు వేసేవారని తెలిపారు ఆయన కోడలు.

" ఓటు వేసేందుకు ఆయన భార్యను వెంటబెట్టుకొని సైకిల్​పై వెళ్లేవారు. బలహీనత కారణంగా ఆయన మూడేళ్ల క్రితమే సైకిల్​ నడపడం మానేశారు. ఆయన పిల్లలు ఓటు వేసేందుకు ఆలస్యంగా వెళ్లేవారు. కానీ ఆయన మాత్రం సైకిల్​పై ఉదయాన్నే వెళ్లి ఓటు వేసేవారు" -- బచ్చన్​ సింగ్​ కోడలు

ఓటు వేయాలని ఆయనెప్పుడూ తమకు చెబుతూనే ఉంటారని అన్నారు బచ్చన్​ సింగ్​ మనవడు గుల్​చంద్​ సింగ్​. తమ కుటుంబంలోని ఒక్క ఓటు కూడా వృథా కాకుండా ఆయన చేశారని సంతోషంగా చెప్పారు.

బచ్చన్​సింగ్​ సొంత ఊరు పంజాబ్​లోని లాల్​పుర. ఆయన ఇప్పటి వరకు వచ్చిన అన్ని ఎన్నికల్లో ఓటు హక్కు వినియోగించుకున్నారు. ఓటు ఆవశ్యకతను చాటిచెబుతున్నారు.

దిల్లీలోని ఏడు లోక్​సభ స్థానాలకు సార్వత్రిక ఎన్నికల ఆరో విడతలో భాగంగా నేడు పోలింగ్​ జరగనుంది.

ఇదీ చూడండి : "నెహ్రూపై భాజపా నేత వివాదస్పద వ్యాఖ్యలు"