దేశవ్యాప్త లాక్డౌన్ నేపథ్యంలో మూతపడిన పాఠశాలలు, కళాశాలలను పునఃప్రారంభించే అంశంపై ఏప్రిల్ 14న నిర్ణయం తీసుకుంటామని కేంద్రం వెల్లడించింది. దేశంలో కరోనా వ్యాప్తి, తాజా పరిస్థితులపై సమీక్షించిన తర్వాత తుది నిర్ణయం ప్రకటించనున్నట్లు కేంద్ర మానవ వనరుల అభివృద్ధి శాఖ మంత్రి రమేశ్ పోఖ్రియాల్ తెలిపారు.
34 కోట్ల మంది విద్యార్థులు, ఉపాధ్యాయుల భద్రతే ప్రభుత్వానికి ముఖ్యమని స్పష్టం చేశారు పోఖ్రియాల్. ఏప్రిల్ 14 తర్వాత కూడా పాఠశాలలు మూసి ఉంచినట్లయితే.. విద్యార్థులు నష్టపోకుండా ప్రణాళికలు రూపొందిస్తున్నట్లు తెలిపారు.
" ఈ పరిస్థితుల్లో నిర్ణయం తీసుకోవటం చాలా కష్టం. కరోనా వ్యాప్తిపై ఏప్రిల్ 14న సమీక్షించనున్నాం. పాఠశాలలు ప్రారంభించాలా? మరికొంత కాలం మూసి ఉంచాలా అనేదానిపై అప్పటి పరిస్థితుల ఆధారంగా నిర్ణయం తీసుకుంటాం. దేశంలో 34 కోట్ల మంది విద్యార్థులు ఉన్నారు. అది అమెరికా జనాభా కంటే అధికం. వారే మాకు అతిపెద్ద సంపద. వారి భద్రతే ప్రభుత్వానికి ముఖ్యం. "
- రమేశ్ పోఖ్రియాల్, హెచ్ఆర్డీ మంత్రి.
ఆన్లైన్ తరగతులు..
'స్వయం' వంటి ప్రభుత్వ రంగ సాంకేతిక విభాగాల ద్వారా ఇప్పటికే ఆన్లైన్ తరగతులు జరుగుతున్నాయని చెప్పారు కేంద్ర మంత్రి. పాఠశాలల మూసివేత కొనసాగితే.. విద్యాసంవత్సరం కోల్పోకుండా చర్యలు చేపడుతున్నామన్నారు. లాక్డౌన్ సమయంలో పాఠశాలలు, కళాశాలల ప్రణాళికపై ఎప్పటికప్పుడు సమీక్షిస్తున్నట్లు తెలిపారు. వాయిదాపడ్డ పరీక్షలు నిర్వహించి.. ఫలితాలు వెల్లడించే అంశంపై ఇప్పటికే ప్రణాళిక తయారు చేశామని స్పష్టం చేశారు.
సంకేతాలు..
21 రోజుల పాటు విధించిన దేశవ్యాప్త లాక్డౌన్ ఈనెల 14న ముగియనుంది. లాక్డౌన్ను పొడిగించబోమనే సంకేతాలు కేంద్ర ప్రభుత్వం నుంచి ఇప్పటికే వచ్చాయి.
ఇదీ చూడండి: కరోనాను జయించిన నర్సు.. మళ్లీ సేవలందించేందుకు సిద్ధం
