'నిర్బంధ కేంద్రాల్లో ఉంటున్న వారు డబ్బు చెల్లించాల్సిందే'

కరోనా వ్యాప్తి నేపథ్యంలో దిల్లీలో వైద్య నిర్బంధ కేంద్రాలుగా వినియోగిస్తున్న హోటళ్లలో సదుపాయాలు పొందిన వారు.. అందుకు డబ్బు చెల్లించాలని జిల్లా మేజిస్ట్రేట్​ ఉత్తర్వులు జారీ చేశారు. దీన్ని అతిక్రమిస్తే జరిమానా విధిస్తామని స్పష్టం చేశారు.

కరోనా వ్యాప్తితో దిల్లీలో వైద్య నిర్బంధ కేంద్రాలుగా వినియోగిస్తున్న మూడు ప్రైవేటు హోటళ్లలో సదుపాయాలు పొందిన వారు.. అందుకు ఛార్జీలు చెల్లించాల్సి ఉంటుందని జిల్లా మేజిస్ట్రేట్​ తన్వీ గార్గ్​ ఉత్తర్వులు జారీ చేశారు.

కరోనా లక్షణాలున్న వారు, వైరస్​ ప్రభావిత దేశాల నుంచి వచ్చిన వారిని 14 రోజుల పాటు పర్యవేక్షణలో ఉంచాల్సి ఉంటుంది. ఈ నేపథ్యంలో దిల్లీలో గల ఏరోసిటీలోని లెమన్​ ట్రీ, రెడ్​ ఫాక్స్, ఐపీఐఎస్​ అనే మూడు హోటళ్లలో ప్రభుత్వం నిర్బంధ సౌకర్యాలను ఏర్పాటు చేసింది.

అయితే.. ఈ మూడు హోటళ్లలో సౌకర్యాలు పొందిన వారు రోజుకు 3,100 రూపాయల చొప్పున చెల్లించాల్సి ఉంటుందని అధికారులు స్పష్టం చేశారు. ఇందులో పన్ను మినహాయింపు ఉంటుందని పేర్కొన్నారు. ఈ తరహా హోటళ్లలో మూడు పూటల భోజనం, వై ఫై సదుపాయం, టీవీ వంటి సేవలు కల్పిస్తారు. ఈ ఉత్తర్వులను పాటించనివారికి జరిమానా విధిస్తామని గార్గ్​ స్పష్టం చేశారు.

ఇదిలా ఉంటే దిల్లీ ప్రభుత్వం ఏర్పాటు చేసిన నిర్బంధ కేంద్రాల్లో ఎలాంటి డబ్బులు చెల్లించాల్సిన అవసరం లేదని, ప్రస్తుతం వారికి అందిస్తున్న సేవలన్నీ ఉచితమేనని ప్రభుత్వ అధికారు ఒకరు తెలిపారు.

ముంబయిలో మరో వ్యక్తి కరోనా వైరస్​తో మరణించగా..మంగళవారం నాటికి దేశంలో మృతుల సంఖ్య 3కు చేరింది.