భారత వైద్య పరిశోధనా మండలి(ఐసీఎంఆర్)తో కలిసి ఫార్మా దిగ్గజం భారత్ బయోటెక్ రూపొందిస్తున్న కరోనా టీకా 'కొవాగ్జిన్'ను మనుషులపై ప్రయోగించే ప్రక్రియలో మరో ముందడుగుపడింది. తమ ఆసుపత్రిలో మనుషులపై ప్రయోగాలు నిర్వహించేందుకు దిల్లీలోని అఖిల భారత వైద్య విజ్ఞాన సంస్థ(ఎయిమ్స్) నైతిక విలువల కమిటీ సమ్మతించింది.
12 ఆసుపత్రుల ఎంపిక..
ఈ టీకా తొలి, రెండో దశల ప్రయోగాలకు దేశంలోనే ప్రముఖ వైద్య సంస్థ ఎయిమ్స్ సహా 12 ఆసుపత్రులను ఐసీఎంఆర్ ఎంపిక చేసింది. మొదటి దశలో మొత్తం 375 మంది వలంటీర్లకు 'కొవాగ్జిన్'ను ఇవ్వనుండగా వారిలో 100 మంది ఎయిమ్స్లో ఎంపికయ్యే వారే ఉంటారు.
సోమవారం నుంచి..
వలంటీర్ల పేర్ల నమోదును సోమవారం నుంచి చేపట్టనున్నారు. 18-55 ఏళ్ల మధ్య వయసు కలిగి ఉండి, ఇంత వరకు కరోనా సోకని ఆరోగ్యవంతులైన వ్యక్తులనే వలంటీర్లుగా ఎంపిక చేస్తామని ఎయిమ్స్ ప్రొఫెసర్ డా. సంజయ్రాయ్ తెలిపారు. ఇప్పటికే స్వచ్ఛందంగా కొందరు తమ పేర్లను నమోదు చేసుకున్నారని, వారి ఆరోగ్య పరిస్థితిని పరిశీలించిన తర్వాతే టీకా ఇస్తామన్నారు.
హరియాణాలోని రోహ్తక్లో పోస్ట్గ్రాడ్యుయేట్ ఇన్స్టిట్యూట్ ఆఫ్ మెడికల్ సైన్సెస్లో శుక్రవారం వ్యాక్సిన్ మానవ ప్రయోగాలు ప్రారంభమయ్యాయి. ఇక్కడ ముగ్గురు వలంటీర్లకు టీకా ఇచ్చారు.
ఇదీ చూడండి: 'కొవాగ్జిన్' మానవ ట్రయల్స్ షురూ..
