చంద్రయాన్-2 ప్రయోగంలో సమస్య నేపథ్యంలో పలువురు ప్రముఖులు శాస్త్రవేత్తల్లో ధైర్యం నింపే ప్రయత్నం చేశారు. ప్రాజెక్టు కోసం వారి కృషి, అంకితభావాన్ని కొనియాడారు. విక్రమ్ను కోల్పోయినంతమాత్రాన నిరాశ చెందొద్దని భరోసా కల్పించారు.
శాస్త్రవేత్తలకు అండగా దేశం..
చంద్రయాన్-2 ప్రయోగంలో ఇస్రో సాధించిన విజయం పట్ల ప్రతి భారతీయుడు గర్వపడుతున్నాడని పేర్కొన్నారు కేంద్ర హోంమంత్రి, భాజపా అధ్యక్షుడు అమిత్ షా. శాస్త్రవేత్తలకు దేశం మొత్తం అండగా ఉందన్నారు. భవిష్యత్తు ప్రయోగాలు విజయవంతం కావాలని ఆకాంక్షిస్తూ ట్వీట్ చేశారు.
అపజయంతో ముగిసిపోదు...
ల్యాండర్తో సంబంధాలు తెగిపోయినప్పటికీ.. దేశం మొత్తం ఇస్రోకు అండగా నిలిచిందని పేర్కొన్నారు కాంగ్రెస్ అధ్యక్షురాలు సోనియా గాంధీ. ప్రతి అడ్డంకి భవిష్యత్తు విజయానికి ఒక మెట్టు అని తెలిపారు.
భవిష్యత్తు ప్రయోగాలకు పునాది..
చంద్రయాన్-2 ప్రయోగం పట్ల ఇస్రో శాస్త్రవేత్తల కృషిని కొనియాడారు కాంగ్రెస్ అగ్రనేత రాహుల్ గాంధీ. భవిష్యత్తులో చేపట్టబోయే అంతరిక్ష ప్రయోగాలకు పునాది వేశారని పేర్కొన్నారు. శాస్త్రవేత్తల అంకితభావం ప్రతి భారతీయుడికి ప్రేరణ అని తెలిపారు.
ఇదీ చూడండి: 'ఇస్రో కోల్పోయింది విక్రమ్నే... ప్రజల ఆశల్ని కాదు'
