కరోనా వైరస్ సోకిన తర్వాత మానవ ఊపిరితిత్తుల్లోని కణాల్లో తలెత్తిన పరమాణు ప్రతిస్పందనలను అమెరికా శాస్త్రవేత్తలు ఆవిష్కరించారు. ఈ కణాలను వైరస్ హైజాక్ చేస్తున్న తీరును వెలుగులోకి తెచ్చారు. కొవిడ్-19 చికిత్సకు అనువైన ఔషధాలను గుర్తించడానికి ఇది వీలు కల్పిస్తుందని పేర్కొన్నారు. మాస్ స్పెక్ట్రోమెట్రీ సాంకేతికత సాయంతో మానవ ఊపిరితిత్తుల్లోని శ్వాసకోశాలకు సంబంధించిన కణాలపై బోస్టన్ విశ్వవిద్యాలయ శాస్త్రవేత్తలు పరిశోధనలు సాగించారు. కరోనా సోకిన ఊపిరితిత్తుల కణాల్లోని ప్రొటీన్లు, అణువుల చర్యల క్రమాన్ని పరిశీలించారు. సాధారణ ఊపిరితిత్తుల కణాలతో పోలిస్తే వీటిలోని ప్రొటీన్లు, ఫాస్ఫోరిలేషన్ ప్రక్రియల్లో అనూహ్య మార్పులను గమనించారు. ఇన్ఫెక్షన్ సోకిన గంటలోపే గణనీయ స్థాయిలో మార్పులు జరిగాయని వారు తెలిపారు. జీవుల కణాల్లోని ప్రొటీన్ విధులను నియంత్రించడంలో ఫాస్ఫోరిలేషన్ ప్రక్రియ కీలక పాత్ర పోషిస్తుంది. ఆరోగ్యంగా ఉన్న కణాల్లో ప్రొటీన్ లభ్యత, ఫాస్ఫోరిలేషన్ల క్రమంపై ప్రభావం పడుతున్నట్లు పరిశోధకులు గుర్తించారు. ఈ అసాధారణ మార్పుల వల్ల వైరస్ల సంఖ్య ఇబ్బడిముబ్బడిగా పెరుగుతున్నట్లు తేల్చారు.
ఈ క్రమంలో ఆరోగ్యకరమైన కణాలు నాశనమవుతున్నాయని పేర్కొన్నారు. దీనివల్ల ఊపిరితిత్తుల్లో గాయం పెద్దదవుతోందని తెలిపారు. "ఇన్ఫెక్షన్ సోకగానే..మానవ కణంలోని వ్యవస్థలను వైరస్ తనకు అనుకూలంగా మలచుకుంటోంది. తద్వారా మానవ రోగనిరోధకశక్తిని తప్పించుకుంటూ వ్యాధిని వ్యాప్తి చేస్తోంది." అని పరిశోధనలో పాలుపంచుకున్న ఆండ్రూ ఎమిలీ తెలిపారు. ఈ ప్రక్రియలను అడ్డుకునే సామర్థ్యం... ఇప్పటికే ఆమోదం పొందిన 18 ఔషధాలకు ఉన్నట్లు తేల్చారు. వీటిని కొవిడ్-19 నియంత్రణకు వాడొచ్చని పేర్కొన్నారు. ఈ పరిశోధన ద్వారా మహమ్మారికి సంబంధించిన కొత్త అంశాలు వెలుగులోకి వచ్చాయని వివరించారు.
ఇదీ చదవండి : కరోనాకు తోడైన కల్తీ.. ప్రమాదకరంగా ఆహారం
