ఎన్నికల ప్రచారంలో ఒక్కొక్కరిది ఒక్కో శైలి. ప్రజలకు తొందరగా చేరువయ్యే అంశాలను ప్రచారాస్త్రాలుగా మలుచుకుంటున్నారు. మధ్యప్రదేశ్లో కాంగ్రెస్ నేతలు ఇదే సూత్రాన్ని అనుసరించారు. ప్రచారంలో భాగంగా శివపురి పట్టణంలో క్రికెట్ మ్యాచ్ నిర్వహించారు. ఇందులో ప్రముఖ క్రికెటర్, కాంగ్రెస్ నేత నవజోత్ సింగ్ సిద్ధూ, ఎంపీ జ్యోతిరాదిత్య సింధియా ప్రత్యర్థులుగా తలపడ్డారు.
సిద్ధూ ఆధ్వర్యంలోని పంజాబ్ ఎలెవన్, సింధియా నేతృత్వంలోని ఎంపీ ఎలెవన్ పోటీ పడ్డాయి. ప్రసంగాలతో హోరెత్తించే నేతలు... మైదానంలో పరుగులు పెట్టడాన్ని తిలకించేందుకు స్థానికులు భారీ సంఖ్యలో వచ్చారు.
సింధియా బ్యాటింగ్ చేసి ఆకట్టుకున్నారు. సిద్ధు స్వతహాగా క్రికెటర్ కావడం వల్ల తనదైన శైలిలో ఆడారు.
అటు మ్యాచ్... ఇటు నిరసన
కాలుష్యపూరితమైన జాదవ్ సాగర్ సరస్సును శుద్ధి చేయాలని కొంతమంది యువకులు మైదానం బయట నిరసన చేపట్టారు. ఈ ప్రదర్శన సరస్సు పరిస్థితిని సింధియా దృష్టికి తీసుకొచ్చే ప్రయత్నమేనని, ఆందోళన కాదని స్పష్టం చేశారు యువకులు.
"జాదవ్ సాగర్ చాలా కలుషితమైంది. ఇది సింధియా-ఛత్రి ట్రస్ట్ పరిధిలోకే వస్తుంది. రోజురోజుకు సరస్సులో కాలుష్యం మరింత పెరుగుతోంది. వారొక్కరినే ఈ పని చేయమనట్లేదు. వారితో మేమూ ఉంటాం. కలిసి పని చేద్దాం."
-స్థానిక యువకుడు
- ఇదీ చూడండి: కారు వేగం పెరిగితే... గంట మోగుద్ది..!
