కేంద్ర విజిలెన్స్ ప్రధాన కమిషనర్(సీవీసీ)ర్గా సంజయ్ కొఠారి ఎంపికయ్యారు. ప్రస్తుతం రాష్ట్రపతికి కార్యదర్శిగా విధులు నిర్వర్తిస్తున్న ఆయనను ప్రధానమంత్రి నరేంద్ర మోదీ నేతృత్వంలోని ఉన్నత స్థాయి కమిటీ సీవీసీగా ఎంపిక చేసింది.
కాంగ్రెస్ విమర్శలు..
సీవీసీగా కొఠారి ఎంపికను తీవ్రంగా తప్పుపట్టింది కాంగ్రెస్. ఈ విధానం అక్రమమని, రాజ్యాంగ విరుద్ధమని పేర్కొంది. వెంటనే నియామకాన్ని రద్దు చేయాలని డిమాండ్ చేసింది.
కొత్త సీవీసి నియామకానికి మరోమారు ప్రక్రియ ప్రారంభించి దరఖాస్తులు ఆహ్వానించాలని కోరారు కాంగ్రెస్ అధికార ప్రతినిధి మనీశ్ తివారీ. సీవీసీ ఒక రబ్బరు స్టాంప్లా ఉండాలని ప్రభుత్వం కోరుకుంటుందని విమర్శించారు.
" మొత్తం ప్రక్రియను పూర్తిగా రద్దు చేయాలని మేము కోరుతున్నాం. ఎలాంటి వివాదం లేని ఎంపిక కమిటీని ఏర్పాటు చేసి మళ్లీ దరఖాస్తులు ఆహ్వానించేందుకు ప్రక్రియను ప్రారంభించాలి. సరైన పద్ధతిలో ఈ ప్రక్రియ ఉండాలి. ఆ తర్వాత ఉన్నత స్థాయి కమిటీకి సిఫార్సు చేయాలి. "
- మనీశ్ తివారీ, కాంగ్రెస్ ప్రతినిధి
సీవీసీ, సీఐసీల నియామకం అంశంలో ప్రభుత్వంపై ట్విట్టర్ వేదికగా విమర్శలు చేశారు కాంగ్రెస్ ప్రతినిధి రణ్దీప్ సింగ్ సుర్జేవాలా. ప్రధానమంత్రి నరేంద్ర మోదీ నేతృత్వంలోని 'నవ భారత్'లో పారదర్శకత, జవాబుదారీతనం, రాజ్యాంగ విలువలకు చోటులేదని దుయ్యబట్టారు. నియంత్రణ లేని విధంగా నియామకాలు చేపడుతున్నారని ఆరోపించారు. ఉన్నత న్యాయ సంస్థల అంశంలో ఏకపక్షంగా వ్యవహరించటం ప్రజాస్వామ్యానికి హాని చేస్తుందని హెచ్చరించారు సుర్జేవాలా.
ఇదీ చూడండి: నమస్తే ట్రంప్: ఆశలపై నీళ్లు- ట్రేడ్ డీల్ లేనట్టే!
