కాంగ్రెస్పై తీవ్ర స్థాయిలో ధ్వజమెత్తారు ప్రధాని నరేంద్రమోదీ. వ్యక్తుల పేర్లు ప్రస్తావించకుండా కాంగ్రెస్లో ఒకప్పటి దేశభక్తులు లేరని విమర్శించారు. అలాంటివారికి ప్రస్తుతం జాతీయవాద పాఠాలు నేర్పేందుకు ప్రయత్నిస్తున్నారని ఎద్దేవా చేశారు.
మహారాష్ట్ర శాసనసభ ఎన్నికల ప్రచారంలో భాగంగా జల్నా జిల్లా పార్తుర్ బహిరంగ సభలో ప్రసంగించారు మోదీ.
"కాంగ్రెస్ పార్టీలో ఇప్పుడు కొత్త శిక్షణ ప్రారంభిస్తున్నారు. ఆ పార్టీలో జాతీయవాద పాఠాలు నేర్పిస్తున్నారు. ఏడవాలో నవ్వాలో నాకు అర్థం కావటం లేదు. దీనికి అర్థం ఏంటంటే.. స్వాతంత్ర్యోద్యమం నాటి దేశభక్తుల పార్టీ ప్రస్తుతం లేదని కాంగ్రెస్ ఒప్పుకున్నట్లే. కుటుంబవాద రాజకీయాల్లోనే కాంగ్రెస్కు జాతీయవాదం కనిపిస్తోంది. అందుకే ఆ పార్టీ తడబడుతోంది. అంతిమశ్వాస తీసుకుంటోంది."
-నరేంద్రమోదీ, ప్రధానమంత్రి
మహారాష్ట్రలో దేశభక్తి, జాతీయవాదం ఎక్కువని... అయితే కాంగ్రెస్, ఎన్సీపీ నేతలు ఆ విలువలను మరిచిపోయారని విమర్శించారు మోదీ. ఆర్టికల్ 370 రద్దును ఆయా పార్టీలు వ్యతిరేకిస్తున్నాయని మండిపడ్డారు.
ఇదీ చూడండి: 'కశ్మీర్లో శాంతి కోసమే ఆర్టికల్ 370 రద్దు'
