కర్ణాటక అసెంబ్లీ ఉప ఎన్నికలపై కేపీసీసీ కసరత్తు

17 మంది తిరుగుబాటు ఎమ్మెల్యేలపై అనర్హత వేటు వేసిన క్రమంలో ఆ స్థానాల్లో ఉప ఎన్నికలపై కర్ణాటక ప్రదేశ్​ కాంగ్రెస్​ కమిటీ (కేపీసీసీ) కసరత్తు ప్రారంభించింది. ఆ మేరకు మాజీ సీఎం సిద్ధరామయ్య నేతృత్వంలో భేటీ అయ్యారు పార్టీ​ నేతలు. ప్రతి నియోజకవర్గానికి ఇంఛార్జ్​ని నియమించాలని నిర్ణయించారు. అభ్యర్థుల ఎంపికపైనా చర్చించారు.

కర్ణాటకలో కాంగ్రెస్​-జేడీఎస్​ సంకీర్ణ సర్కార్​ కూలి కొత్త ప్రభుత్వం కొలువుదీరింది. 17 మంది తిరుగుబాటు ఎమ్మెల్యేలపై అనర్హత వేటు వేశారు అప్పటి స్పీకర్​ రమేశ్​ కుమార్​. ప్రస్తుతం వారి స్థానాల్లో ఉప ఎన్నికలపై కాంగ్రెస్​ కసరత్తు ప్రారంభించింది. ఈ మేరకు మాజీ ముఖ్యమంత్రి సిద్ధరామయ్య నేతృత్వంలో గురువారం కర్ణాటక ప్రదేశ్​ కాంగ్రెస్​ కమిటీ(కేపీసీసీ) భేటీ అయ్యింది. అభ్యర్థుల ఎంపిక, ఎన్నికల వ్యూహాలపై చర్చించారు. ప్రతి నియోజకవర్గానికి సీనియర్​ నాయకుడి నేతృత్వంలో బృందాన్ని నియమించాలని నిర్ణయించారు. నియోజకవర్గాల ఇంఛార్జ్​లను శుక్రవారం ప్రకటించనుంది పార్టీ.

"17 నియోజకవర్గాలకు ఉప ఎన్నికలు జరగనున్నాయి. ఈ ఎన్నికల్ని ఏ విధంగా ఎదుర్కోవాలో చర్చించేందుకు భేటీ అయ్యాం. ప్రతిఒక్క నియోజకవర్గానికి సీనియర్​ నాయకుడి అధ్యక్షతన బృందాన్ని ఏర్పాటు చేయనున్నాం. వారు తక్షణమే వారికి కేటాయించిన నియోజకవర్గాల్లో పర్యటిస్తారు."

- దినేష్​ గుండూరావు, రాష్ట్ర కాంగ్రెస్ అధ్యక్షుడు

జేడీఎస్​తో పొత్తు...

ఉప ఎన్నికల్లో జేడీఎస్​తో పొత్తు కొనసాగుతుందా అనే ప్రశ్నకు ఎలాంటి సమాధానం ఇవ్వలేదు కేపీసీసీ నేతలు. పార్టీ అధిష్ఠానం కూటమి అంశంపై నిర్ణయం తీసుకుంటుందని తెలిపారు. కానీ.. ఉప ఎన్నికల్లో సొంతంగానే పోటీచేయాలని పార్టీ నేతలు కోరుకుంటున్నట్లు సమాచారం.

'రెబల్స్​'పై న్యాయపోరాటం

అనర్హతకు గురైన ఎమ్మెల్యేలపై సుప్రీం కోర్టులో న్యాయపోరాటం చేయాలని నిర్ణయం తీసుకున్నట్లు తెలిపారు గుండూరావు. ఫిరాయింపుల చట్టాన్ని కోర్టు పరిగణనలోకి తీసుకుంటుందని పూర్తి నమ్మకం ఉందన్నారు. వారిపై తప్పనిసరిగా చర్యలు తీసుకోవాలని పేర్కొన్నారు.

ఇదీ చూడండి: కశ్మీర్ ఎన్నికల నిర్వహణపై మోదీతో ఫరూక్​ భేటీ