భారత్-చైనా మధ్య ఉన్న భేదాభిప్రాయాలు.. ద్వైపాక్షిక సంబంధాలపై ప్రభావం చూపకూడదని జాగ్రత్త వహించాల్సిన అవసరముందని అభిప్రాయపడ్డారు భారత్లోని చైనా రాయబారి సన్ వైడాంగ్. ఇరు దేశాలు పరస్పర విశ్వాసంతో ముందుకు సాగాలని ఆకాంక్షించారు. వాస్తవాధీన రేఖ వెంబడి భారత్-చైనా సైనికుల మధ్య ఉద్రిక్త వాతావరణం నెలకొన్న తరుణంలో వైడాంగ్ ఈ వ్యాఖ్యలు చేశారు.
ఇరు దేశాల మధ్య ఉన్న భేదాలను చర్చల ద్వారా పరిష్కరించుకోవాలని వైడాంగ్ సూచించారు. ఒకరినొకరు ఏ విధంగా కూడా హాని పరుచుకోకూడదన్న ప్రాథమిక నియమానికి ఇరుదేశాలు కట్టుబడి ఉండాలన్నారు.
"మన మధ్య ఉన్న భేదాభిప్రాయాలను సరైన రీతిలో అర్థం చేసుకోవాలి. ఆ ప్రభావం మన ద్వైపాక్షిక సంబంధాలపై పడకూడదు. అదే సమయంలో చర్చల ద్వారా సమస్యలను పరిష్కరించుకోవాలి. చైనా-భారత్ ఒకరికి ఒకరు తోడుగా ఉండాలి. తన అభివృద్ధితో పాటు భారత్కు వృద్ధి చెందాలని చైనా కోరుకుంటోంది. తమ లక్ష్యాలను ఛేదించడానికి ఇరు దేశాలు సహకరించుకోవాలి."
-- సన్ వైడాంగ్, భారత్లోని చైనా రాయబారి.
భారత్, చైనా మధ్య తలెత్తిన సరిహద్దు వివాదం అంతకంతకూ ముదురుతోంది. ప్రస్తుత పరిస్థితులు మరో డోక్లాంను తలపించేలా ఉన్నాయి. కరోనా విజృంభించిన వేళ.. సైనికుల చొరబాటు చర్యతో భారత్ను ఇరుకున పెట్టేందుకు ప్రయత్నిస్తోంది చైనా.
ఇదీ చూడండి:- ఢీ అంటే ఢీ: సరిహద్దులో భారత్- చైనా బలగాల మోహరింపు
