మాస్టారూ వెళ్లొద్దంటూ విద్యార్థుల కన్నీటిపర్యంతం

మధ్యప్రదేశ్​లోని ఓ పాఠశాల విద్యార్థులు.. ఉపాధ్యాయుడిని బడి నుంచి వెళ్లేందుకు వీల్లేదని పట్టుపట్టారు. పదవీ విరమణ పొందిన ఉపాధ్యాయుడిని 'వెళ్లొద్దు సారూ' అని ప్రాధేయపడ్డారు. మాస్టారుని పట్టుకుని వెక్కివెక్కి ఏడ్చిన ఆ దృశ్యం చూస్తే.. కంటనీరు ఆగదు!

కొందరు విద్యార్థులు బడికి వెళ్లాలంటేనే భయపడిపోతారు. ఫలానా టీచర్ ఈ రోజు బడికి రాకపోతే బావుంటుందనుకుంటారు. కానీ మధ్యప్రదేశ్ హోషంగాబాద్​ జిల్లాలో రాధేశ్యాం రఘువంశి అనే ఉపాధ్యాయుడు రాకపోతే బడి బోసిపోతుందట. అందుకే పదవీ విరమణ పొంది బడి నుంచి వెళుతున్న ఈ మాస్టారుకు కన్నీటి వీడ్కోలు తెలిపారు విద్యార్థులు.

పాటతో ఏడ్పించేశారు..

సివ్నీమాల్వా తాలూకా.. చాప్డా గ్రామంలోని సర్కారు బడిలో ఉపాధ్యాయుడిగా సేవలందించిన రఘువంశి ఇటీవల పదవీవిరమణ పొందారు. సన్మాన వేదికపై 'మీరు లేకపోతే ఈ బడి బోసిపోతుంది. మా చిన్ని మనస్సులు శూన్యంగా మారిపోతాయి. దయచేసి మీరు మాతోనే ఉండిపోండి గురువుగారు' అని ఏడుస్తూ విద్యార్థినిలు పాడిన పాటకు అక్కడున్నవారంతా కంటతడి పెట్టుకున్నారు.

ఇక బడి నుంచి ఇంటికి బయల్దేరిన రఘవంశిని కదలనీయకుండా గట్టిగా పట్టుకున్నారు విద్యార్థులు. గుండెలు పగిలేలా ఏడుస్తూ 'మీరు ఎక్కడికీ వెళ్లొద్దు మాస్టారు, మాతోనే ఉండాలి' అంటూ ప్రాధేయపడ్డ విధానం.. చూసినవారందరినీ కంటతడి పెట్టించింది.

ఎందుకింత అభిమానం?

రఘువంశి మాస్టారు.. పుస్తకంలోని పాఠాలే కాదు, జీవితానికి కావాల్సిన ఎన్నో విషయాలను ఎంతో చక్కగా నేర్పించేవారని చెబుతున్నారు విద్యార్థులు. అందుకే విలువలు నేర్పిన టీచరు ఇకపై బడికి రారు అనగానే దుఃఖం తన్నుకొచ్చింది అంటున్నారు.

"నేను విద్యార్థులకు నా కన్నబిడ్డలకంటే ఎక్కువ ప్రేమను పంచాను. మంచి సంస్కారం నేర్పించాను. అందుకే వారు నాకు ఇలాంటి ప్రతిఫలం ఇచ్చారు. 15 ఏళ్లుగా నేను ఈ బడిలో సేవలందిస్తున్నా. నేను ప్రతి ఉపాధ్యాయుడికి ఒకటే చెబుతా. నిష్ఠతో వృత్తిని నిర్వర్తించాలి. అప్పుడే, విద్యార్థులు మిమ్మల్ని ప్రేమిస్తారు."

- రాధేశ్యాం రఘువంశి

ఇదీ చదవండి:మారుతున్న తీరు.. రెండో పెళ్లికి సై అంటున్నారు వీరు..