పశ్చిమ బెంగాల్లో కొనసాగుతున్న హింసాకాండపై కేంద్ర ప్రభుత్వం ఆందోళన వ్యక్తం చేసింది. లోక్సభ ఎన్నికలు ముగిసినా రాష్ట్రంలో హింస కొనసాగుతుండటం మమతాబెనర్జీ ప్రభుత్వ వైఫల్యానికి చిహ్నమని విమర్శించింది.
బంగాల్లో లా అండ్ ఆర్డర్, శాంతి భద్రతలు కాపాడాలని... ప్రజాశాంతిని నెలకొల్పాలని మమతా బెనర్జీ ప్రభుత్వానికి, కేంద్ర హోంమంత్రిత్వశాఖ సూచించింది.
"గత కొన్ని వారాలుగా రాష్ట్రంలో జరుగుతున్న హింస.. రాష్ట్ర ప్రభుత్వ యంత్రాంగ వైఫల్యాన్ని సూచిస్తోంది. శాంతిభద్రతలు అమలు చేయలేక... ప్రజల్లో నమ్మకాన్ని, విశ్వాసాన్ని నెలకొల్పలేకపోయింది."- కేంద్ర హోంమంత్రిత్వశాఖ
విధి నిర్వహణలో అవినీతికి పాల్పడిన అధికారులపై కఠిన చర్యలు తీసుకుని, వారిని విధుల నుంచి తొలగించాలని హోంమంత్రిత్వశాఖ సూచించింది.
హోంమంత్రిత్వశాఖ విడుదల చేసిన నివేదిక ప్రకారం.. బంగాల్ ఉత్తర 24 పరగణా జిల్లాలో శనివారం జరిగిన హింసాకాండలో నలుగురు వ్యక్తులు మరణించారు. ఇంతకు మునుపూ రాష్ట్రంలో పలువురు వ్యక్తులు హింసాకాండకు బలయ్యారని అధికారులు చెబుతున్నారు.
ఇదీ చూడండి: తప్పించుకున్నా.. విధి వక్రించి బలి తప్పలేదు!
