శారదా కుంభకోణం కేసులో విచారణకు హాజరు కావాలన్న ఆదేశాలను వరుసగా రెండోసారి ఉల్లంఘించారు కోల్కతా మాజీ పోలీస్ కమిషనర్ రాజీవ్కుమార్. ఈ ఉదయం 10 గంటలకు కోల్కతాలోని సీబీఐ కార్యాలయానికి రావాలంటూ ఇచ్చిన నోటీసులను ఆయన బేఖాతరు చేశారు.
రాజీవ్ను వెతికేందుకు ఓ ప్రత్యేక బృందాన్ని ఏర్పాటు చేసింది కేంద్ర దర్యాప్తు సంస్థ. తమ ఎదుట హాజరుకావాలని మాజీ సీపీకి సూచించాలని కోరుతూ బంగాల్ డీజీపీ, ప్రభుత్వ ప్రధాన కార్యదర్శికి సీబీఐ లేఖ రాసినట్లు సమాచారం.
రాజీవ్ను అరెస్టు చేయరాదంటూ కల్పించిన రక్షణను కోల్కతా హైకోర్టు శుక్రవారం తొలగించింది. ఆ తర్వాత ఆయన అదృశ్యమయ్యారు. విచారణకు రావాలని రాజీవ్కు ఇప్పటికే 2 సార్లు నోటీసులిచ్చింది సీబీఐ. అయితే... విచారణకు గైర్హాజరైన ఆయన... ముందస్తు బెయిల్ కోసం ఈ ఉదయం ప్రత్యేక కోర్టును ఆశ్రయించారు. ఆయన అభ్యర్థనను న్యాయస్థానం తోసిపుచ్చింది.
ఇదీ కేసు...
అధిక లాభాలు వస్తాయని మదుపర్లను మభ్యపెట్టి శారద గ్రూప్ సంస్థలు రూ.2,500 కోట్ల మేర అవకతవకలకు పాల్పడినట్లు ఆరోపణలున్నాయి. ఈ కేసు విచారణ కోసం బంగాల్ ప్రభుత్వం ఏర్పాటు చేసిన ప్రత్యేక దర్యాప్తు బృందంలో అధికారిగా ఉన్నారు రాజీవ్. సాక్ష్యాలను తారుమారు చేశారన్నది ఆయనపై ప్రధాన ఆరోపణ.
ఇదీ చూడండి: 700 కిలోల కేక్తో మోదీ పుట్టినరోజు వేడుక
