'క్వాలిటీ సంస్థ'పై రూ.1400 కోట్ల బ్యాంకు మోసం కేసు

బ్యాంకులకు సుమారు రూ.1400 కోట్ల మేర మోసం చేసిన ఆరోపణలతో దిల్లీకి చెందిన డైరీ ఉత్పత్తుల సంస్థ క్వాలిటీ లిమిటెడ్​పై కేసు నమోదైంది. కేసులో భాగంగా సంస్థతో పాటు దాని డైరెక్టర్లుకు చెందిన ఎనిమిది ప్రాంతాల్లో సోదాలు నిర్వహించింది కేంద్ర దర్యాప్తు సంస్థ.

దిల్లీకి చెందిన డైరీ ఉత్పత్తుల సంస్థ క్వాలిటీ లిమిటెడ్​పై బ్యాంకు మోసం కేసు నమోదు చేసింది కేంద్ర దర్యాప్తు సంస్థ(సీబీఐ). బ్యాంక్​ ఆఫ్​ ఇండియా నేతృత్వంలోని కన్సార్టియంను సుమారు రూ. 1,400 కోట్ల మేర మోసం చేసిన ఆరోపణలతో క్వాలిటీ సంస్థ, దాని డైరెక్టర్లకు చెందిన ఎనిమిది ప్రాంతాల్లో సోమవారం సోదాలు నిర్వహించింది. అందులో.. దిల్లీలోని సహరాంపుర్​, బులంద్​షహర్​(ఉత్తర్​ప్రదేశ్​), అజ్మెర్​ (రాజస్థాన్​), పల్వాల్​(హరియాణా)లు ఉన్నాయి.

క్వాలిటీ లిమిటెడ్​ సంస్థ, దాని డైరెక్టర్లు సంజయ్​ ధింగ్రా, సిద్ధాంత్​ గుప్తా, అరుణ్​ శ్రీవాస్తవాలతో పాటు మరికొందరిపై కేసు నమోదైంది.

"బ్యాంక్​ ఆఫ్​ ఇండియా నేతృత్వంలోని కన్సార్టియంను మోసం చేసినట్లు ఫిర్యాదు అందింది. బ్యాంకు నిధులను మళ్లించటం, సంబంధీకులతో లావాదేవీలు, కల్పిత పత్రాలు, రిసిప్టులు, తప్పుడు అకౌంట్​ బుక్స్​, కల్పిత ఆస్తులను చూపి సుమారు రూ.1400.62 కోట్ల మోసానికి పాల్పిడినట్లు తెలిసింది."

- ఆర్​కే గౌర్​, సీబీఐ అధికార ప్రతినిధి.

బ్యాంక్​ ఆఫ్​ ఇండియా నేతృత్వంలోని కన్సార్టియంలో.. బీఓఐ, కెనరా బ్యాంకు, బీఓబీ, ఆంధ్రాబ్యాంకు, కార్పోరేషన్​ బ్యాంకు, ఐడీబీఐ, సెంట్రల్​ బ్యాంక్​ ఆఫ్​ ఇండియా, ధనలక్ష్మీ బ్యాంకు, సిండికేట్​ బ్యాంకుల ఉన్నాయి.

ఇదీ చూడండి:ఈఎంఐ వాయిదాకు సాయం ముసుగులో ఖాతాలు ఖాళీ