అంతర్జాతీయ మార్కెట్లో చలామణి అవుతున్న నకిలీ కొవిడ్-19 టెస్టింగ్ కిట్లపై రాష్ట్రాల పోలీసు విభాగాలను అప్రమత్తం చేసింది కేంద్ర దర్యాప్తు సంస్థ (సీబీఐ). అంతర్జాతీయ క్రిమినల్ పోలీసు ఆర్గనైజేషన్ (ఇంటర్పోల్) సమాచారం మేరకు పలు హెచ్చరికలు చేసినట్లు తెలుస్తోంది.
అయితే ఈ జాబితాలో భారత్కు చెందిన ఏ సంస్థగానీ, సరఫరాదారుగానీ లేరని విశ్వసనీయ వర్గాలు స్పష్టం చేశాయి. ఈ విషయానికి సంబంధించి మరింత సమాచారం అందించేందుకు విముఖత వ్యక్తం చేశాయి. ఈ వివరాలు బహిర్గతం చేస్తే.. ప్రస్తుతం పోలీసుల నిఘాలో ఉన్న సంస్థలు అప్రమత్తమయ్యే అవకాశాలున్నాయని వివరించారు ఆ అధికారులు. తప్పుడు టెస్టింగ్ కిట్లపై మొత్తం 194 దేశాలను ఇంటర్పోల్ అధికారులు అప్రమత్తం చేసినట్లు తెలుస్తోంది.
కరోనా మహమ్మారి ప్రపంచదేశాలపై విరుచుకుపడిన తర్వాత ఇంటర్పోల్ అధికారులు అంతర్జాతీయ నేరాలను పెద్ద సంఖ్యలో గుర్తించారు. ఆన్‌లైన్లో అమ్ముడవుతున్న నకిలీ ఔషధాలు, వైద్య పరికాలతో పాటు ఆసుపత్రులను లక్ష్యంగా చేసుకుని సాగిస్తున్న ఆర్థిక మోసాలు ఎక్కువగా సాగుతున్నట్లు పసిగట్టారు.
ఇదీ చూడండి : కిమ్ జోంగ్కు రష్యా 'స్మారక యుద్ధ పతకం'
