ఎన్డీయే ప్రభుత్వం కొత్తగా ఏర్పాటుచేసిన 8 మంత్రివర్గ ఉపసంఘాల్లోనూ కేంద్ర హోంమంత్రి అమిత్షా భాగస్వామిగా ఉన్నారు. ఇది మోదీ 2.0 ప్రభుత్వంలో అమిత్షా ప్రాముఖ్యతను చాటిచెబుతోంది.
కేంద్ర ప్రభుత్వం గురువారం కొత్తగా 8 మంత్రివర్గ ఉపసంఘాలను ఏర్పాటుచేసింది. వీటిలో నియామకాలు, భద్రత, ఆర్థిక వ్యవహారాలు చూసే కీలక కమిటీలు ఉన్నాయి. వీటితో పాటు వసతులు, పార్లమెంటరీ వ్యవహారాలు, పెట్టుబడుల్లో పురోగతి, ఉద్యోగ భద్రత, నైపుణ్యాభివృద్ధి అంశాలపై మంత్రివర్గాలను ఏర్పాటు చేసింది మోదీ ప్రభుత్వం.
వీరికి ప్రాధాన్యం తగ్గిందా..
వీటిలో ప్రధాని మోదీ 6 ఉపసంఘాల్లో, హోం మంత్రి అమిత్ షా అన్ని ఉపసంఘాల్లో భాగస్వాములుగా ఉన్నారు. ఆర్థిక మంత్రి నిర్మలా సీతారామన్ ఏడు కమిటీల్లో సభ్యురాలుగా ఉన్నారు.
గత ప్రభుత్వంలో హోంమంత్రిగా పనిచేసిన రాజ్నాథ్ సింగ్ ఆరు కేబినెట్ కమిటీల్లో సభ్యులుగా ఉండేవారు. ప్రస్తుతం ఆయన రక్షణమంత్రిగా ఉన్నా.. కేవలం ఆర్థిక వ్యవహారాలు, భద్రత కమిటీల్లో మాత్రమే భాగస్వామిగా ఉన్నారు. కీలకమైన రాజకీయ వ్యవహారాల కమిటీలో ఆయనకు చోటు కల్పించకపోవడం గమనార్హం.
ఈ విషయాలను పరిశీంచిన మీదట, ప్రస్తుతం భాజపాలో మోదీ తరువాత అత్యంత కీలకమైన వ్యక్తి, నెం-2 అమిత్షా మాత్రమే అని రాజకీయ విశ్లేషకులు భావిస్తున్నారు.
షా అనధికార సమావేశం..
అమిత్షా జాన్ 4న ముడిచమురు సంబంధిత అంశాలపై కేంద్రమంత్రులతో ఓ అనధికార సమావేశం నిర్వహించారు. ఈ సమావేశంలో విదేశీ వ్యవహారాలశాఖ మంత్రి ఎస్. జైశంకర్, వాణిజ్య, రైల్వే మంత్రి పీయూష్ గోయెల్, పెట్రోలియం మంత్రి ధర్మేంద్ర ప్రధాన్లతోపాటు ఆర్థికమంత్రి నిర్మలా సీతారామన్ కూడా పాల్గొన్నారు.
తప్పుకున్న జైట్లీ..
గత ఏన్డీయే ప్రభుత్వంలో ఆర్థికమంత్రిగా ఉన్న అరుణ్జైట్లీ ఆరోగ్య కారణాల రీత్యా.. ప్రస్తుత ప్రభుత్వంలో మంత్రి పదవి చేపట్టలేనని స్వచ్ఛందంగా తప్పుకున్నారు.
భాజపా మిత్ర పక్షాల నేతలైన రామ్ విలాస్ పాసవాన్, హర్షిమ్రత్కౌర్ బాదల్, అర్వింద్ సావంత్.. గతంలో మాదిరిగానే కొన్ని ఉపసంఘాల్లో సభ్యులుగా ఉన్నారు.
అత్యంత కీలకమైన ఈ మంత్రివర్గ ఉపసంఘాల్లో సమతుల్యత ఉండేలా భాజపా ప్రత్యేక శ్రద్ధ తీసుకుంది.
ఇదీ చూడండి: ముఖ్యమంత్రితో సెల్ఫీకి ప్రయత్నిస్తే....
