దేశవ్యాప్త బంద్​: బంగాల్​లో నిరసనలు ఉద్ధృతం

కార్మిక సంఘాల పిలుపు మేరకు నేడు దేశవ్యాప్త బంద్​ కొనసాగుతోంది. బంగాల్​లో రైల్​రోకో నిర్వహించారు ఆందోళనకారులు. ముంబయిలో నిరసనలను తెలుపుతూ రోడ్లపై టైర్లకు నిప్పంటించారు.

కేంద్ర ప్రభుత్వ 'ప్రజావ్యతిరేక' విధానాలకు నిరసనగా 10 కేంద్ర కార్మిక సంఘాలు నేడు దేశవ్యాప్త సమ్మెకు పిలుపునిచ్చాయి. ఈ నేపథ్యంలో పలు రాష్ట్రాల్లో నిరసనలు హోరెత్తుతున్నాయి. బంగాల్​లో ఆందోళనలు మిన్నంటాయి. రైల్​రోకో నిర్వహించారు ఆందోళనకారులు. కేంద్ర ప్రభుత్వానికి వ్యతిరేకంగా జెండాలు పట్టుకొని రైల్వే ట్రాక్​పై నినాదాలు చేశారు. ఫలితంగా రైలు రాకపోకలకు తీవ్ర అంతరాయం ఏర్పడింది.

ముంబయిలో నిరసనలను తెలుపుతూ రోడ్లపై టైర్లకు నిప్పంటించారు. బంద్​ కారణంగా రవాణా వ్యవస్థకు తీవ్ర అంతరాయం ఏర్పడింది.

ఎందుకీ బంద్​?

ఈనెల 2వ తేదీన జరిగిన సమావేశంలో కార్మికుల డిమాండ్లపై భరోసా ఇవ్వడంలో కేంద్ర కార్మికశాఖ విఫలమైందని, అందుకే ప్రభుత్వ కార్మిక వ్యతిరేక విధానాలకు నిరసనగా జనవరి 8న అఖిల భారత సమ్మెకు పది కేంద్ర కార్మిక సంఘాలు పిలుపునిచ్చాయి.