టీఆర్‌పీల విషయంలో కొన్ని ఛానళ్లు చేసిన మోసాలు ప్రస్తుతం చర్చనీయాంశంగా మారాయి. ఈ మధ్య కాలంలో ఈ కుంభకోణాలపై పెద్ద ఎత్తున చర్చ నడిచింది. ఈ నేపథ్యంలో వార్తా సంస్థల రేటింగ్లు తాత్కాలికంగా నిలిపివేస్తున్నట్లు రేటింగ్ ఏజెన్సీ అయిన బ్రాడ్కాస్ట్ ఆడియన్స్ రీసెర్చ్ కౌన్సిల్(బార్క్) వెల్లడించింది. ఈ నిర్ణయం హిందీ, ప్రాంతీయ, ఆంగ్ల, బిజినెస్ న్యూస్ ఛానళ్లపై ప్రభావం చూపనుంది.
రేటింగ్ గణాంకాలను మెరుగుపరచడానికి ప్రస్తుత ప్రమాణాలను సమీక్షించి, వాటిలో మార్పులు చేర్పులు చేయాలని బార్క్ భావిస్తోంది. ఈ క్రమంలో వీక్లీ రేటింగ్ల లెక్కింపును 12 వారాల వరకు నిలిపేస్తున్నట్లు అధికారిక ప్రకటన చేసింది.
ఫేక్‌ రేటింగ్ పాయింట్స్‌పై బార్క్ ఇచ్చిన ఫిర్యాదు మేరకు పలు ఛానెళ్లపై దృష్టి పెట్టగా.. ఇటీవల మోసాలు వెలుగు చూసినట్లు ముంబయి పోలీసులు తెలిపారు.
ఎన్బీఏ ప్రశంసలు
బార్క్ నిర్ణయాన్ని స్వాగతించింది న్యూస్ బ్రాడ్కాస్టర్స్ అసోసియేషన్(ఎన్బీఏ). భారత ప్రేక్షకులు ఏమి చూస్తున్నారన్న కచ్చితమైన సమాచారాన్ని సేకరించి.. ప్రజల్లో వ్యవస్థపై విశ్వాసాన్ని పునరుద్ధరించాలని కోరింది.
హైకోర్టుకే వెళ్లండి..
ఎక్కువ రేటింగ్లు పొందేందుకు కొన్ని ఛానళ్లకు అక్రమాలకు పాల్పడుతున్నాయన్న ముంబయి పోలీసుల ప్రకటనతో... టీఆర్పీ కుంభకోణం బయటపడింది. ఈ వ్యవహారంపై నమోదు చేసిన కేసును తప్పుబడుతూ రిపబ్లిక్ టీవీ సుప్రీంకోర్టును ఆశ్రయించింది. అయితే బొంబాయి హైకోర్టులోనే తేల్చుకోవాలంటూ గురువారం వ్యాజ్యాన్ని తోసిపుచ్చింది సుప్రీంకోర్టు.
ఇదీ చూడండి: టీఆర్పీ స్కామ్ బట్టబయలు- 3 ఛానళ్లపై కేసులు
